राष्ट्रिय योजना आयोगले १६ औं योजनाका लागि प्रदेशगत रूपमा छलफल गर्न सुरू गरेका छ। सातै प्रदेशमा जाने योजना अनुरूप योजना आयोगले छुट्टाछुट्टै टोली बनाएर छलफलका लागि पठाएको हो।
आयोगले सोमबार मधेश प्रदेशसहितका ठाउँहरूमा छलफल गर्दैछ। मधेश प्रदेशको जनकपुरमा भइरहेको छलफलमा मधेश प्रदेश सरकारका मुख्यमन्त्रीसहित स्थानीय तह र निजी क्षेत्रका प्रतिनिधिहरू सहभागी छन्।
आयोगका प्रवक्ता यमलाल भुसालका अनुसार १६औं योजनाको मस्यौदाका बारेमा सबै प्रदेशमा आयोगका सदस्यको नेतृत्वमा टोली परिचालन गरिएको छ। कर्णाली प्रदेशमा भने प्राकृतिक विपत्तिका कारण तत्काललाई स्थगित गरिएको छ। बाकीँ सबै प्रदेशमा आयोगको टोली खटाइएको छ।
कसको नेतृत्वमा कुन प्रदेश?
आयोगका प्रवक्ता सहसचिव भुसालका अनुसार कात्तिक २० र २१ गते बागमती प्रदेशको हेटौडा, मधेश प्रदेशको जनकपुर र सुदूरपश्चिम प्रदेशको धनगढीमा छलफल कार्यक्रम राखिएको छ। यसका लागि आयोगका सदस्यहरू डा. प्रभु बुढाथोकी, डा. जयकान्त राउत, डा. रामकुमार फुयाँल र डा. अनिता शाह ढुंगानाको नेतृत्वमा छुट्टाछुट्टै टोली परिचालन गरिएको छ।
यस्तै कात्तिक २३ र २४ गते कोशी प्रदेशको विराटनगर र लुम्बिनी प्रदेशको बुटवलमा छलफल कार्यक्रम राखिएको छ। उनका अनुसार यी दुई प्रदेशका लागि आयोग सदस्य डा. आरपी विच्छा र डा. रमेशचन्द्र पौडेलको नेतृत्वमा टोली परिचालन गरिएको छ। कर्णाली प्रदेशमा भने भूकम्पका कारण टोली रोकिएको उनले जानकारी दिए।
प्रदेश सरकार, स्थानीय सरकार र निजी क्षेत्रहरूको समेत सुझाव संकलन गरेर १६ औं पञ्चवर्षीय योजना तयार पार्ने आयोगले जनाएको छ।
