सांसद स्वर्णिम वाग्लेले मन्दीको छनक तल्लो तहसम्म पुगेको भन्दै सजग र सचेत हुनुपर्ने बताएका छन्।
मेक इन नेपाल सम्मेलनको क्रममा वाग्लेले उपभोक्ता मागमा कमी आएसँगै उत्पादनमा ह्रास आइरहेको व्यवसायीहरूले नयाँ लगानी योजना पर सारेकोले तल्लो तहसम्म नै समस्या रहेको बताएका छन्।
'म चुनाबमा लड्ने क्रममा चाउचाउ, साबुन बेच्ने व्यवसायीलाई सोध्दा पहोर ४० हजारको कारोबार मासिक हुने गरेकोमा अहिले ७/८ हजार मात्रैको हुने भनाइ थियो।' उनले भने 'यो भनेको आर्थिक मन्दिको छनक तल्लो तहसम्म पुगेको हो।'
उनले सरकारले व्यवसायिक र औद्योगिक वातावरण बनाउनको लागि छुट र अनुदानलाई भन्दा पूर्वाधार विकास तथा दक्ष जनशक्ति उत्पादनलाई ध्यान दिनुपर्ने बताए।
स्वदेशी उद्योग तथा उत्पादनलाई संरक्षण गर्नु राष्ट्रिय हित हुने भएकोले पनि एक हदसम्म महँगो भएर पनि नेपाली उत्पादन प्रयोगमा प्रोत्साहन गर्नुपर्ने बताए।
व्यवसायीहरूलाई तत्कालिन लाभ उठाउने नाममा नेताहरूको ढोका चाहार्ने प्रवृत्तिमा केन्द्रित नहुन उनको आग्रह छ।
उनले मूल्य अभिवृद्धि गर्ने उत्पादनमा ध्यान दिन र सुविधा लिन व्यवसायीलाई आग्रह गरे। सरकाले निजीक्षेत्र मैत्री वातवरण बनाउनु पर्ने उनले बताए।
नेपाल उद्योग परिसंघका अध्यक्ष विष्णुकुमार अग्रवालले आगामी पाँच वर्षलाई लगानी वर्ष घोषणा गरेर कानुनी तथा संरचनागत सुधार गर्नको लागि आग्रह गरे।
उनले मेक इन नेपालको उद्देश्य स्वदेशी उत्पादन बढाउने र प्रतिस्पर्धी बनाउने रहेको भन्दै सरकारको तर्फबाट आवश्यक सहयोग चाहिएको बताए।
पछिल्लो डेढ वर्षको अवधिमा यस अभियानमा करिब ११० नेपाली कम्पनी आवद्ध भएको उनले बताए। यी कम्पनीहरूका उत्पादन गुणस्तर र मूल्य दुवै दृष्टिले प्रतिस्पर्धी भएको उनले बताए।
देशको औद्योगिक विकासमा औद्योगिक क्षेत्रको अवधारणा र यसको प्रवर्द्धन आवश्यक रहेको उनले बताए।
जलस्रोत, वन सम्पदा, गिट्टी–ढुंगा, जडिबुटी लगायतमा रहेको व्यवसायिक सम्भावनालाई सन्तुलित र अधिकतम उपयोग गरेर समृद्धि हासिलमा सदुपयोग गर्न उनको आग्रह छ।
पाँच वर्षमा गिटी ढुंगा निर्यातबाट २ खर्ब र काठजन्य वस्तुको निर्यातबाट एक खर्ब रुपैयाँ आर्जन गर्न सकिने अनुमान गरिएको उनले बताए।
