नेपाल उद्योग वाणिज्य महासंघले आगामी बजेटबाट संस्थागत आयकरको दर घटाउनको लागि अर्थमन्त्रीलाई आग्रह गरेको छ। बुधबार महासंघले राखेको पूर्व बजेट छलफलमा व्यावसायिक प्रतिस्पर्धी वातावरण बनाउनको लागि दर घटाउने पर्ने माग महासंघ अध्यक्ष चन्द्र ढकालले गरेका हुन्।
'धेरै मुलुकले लगानी आकर्षित गर्न संस्थागत आयकरको दर घटाइसकेको सन्दर्भमा प्रतिस्पर्धी व्यावसायिक वातावरणका लागि नेपालमा पनि दर घटाउन आवश्यक छ।' अध्यक्ष ढकालले भने 'द्धन्दका बेला बढाइएको मूल्य अभिवृद्धि करको दरलाई अहिलेसम्म समायोजन गरिएको छैन। यसमा समय सापेक्ष सुधार आवश्यक छ। यो व्यवसायीको हितका लागि मात्र होइन। यसले उपभोक्ताको क्रय शक्ति बढ्छ र समग्र अर्थतन्त्रमा गुणात्मक प्रभाव पर्नेछ।'
उनले तुलनात्मक लाभ भएका लगानीका क्षेत्रमा निजी क्षेत्रलाई अवसर दिनु पर्ने बताए। नेपालको फलाम लगायत खनिज जन्य पदार्थको उत्पादन एवं निर्यातमा विशेष कार्यक्रम आवश्यक रहेको बताए।
'विभिन्न खोलाहरूमा गिटी ढुंगा बालुवा थुप्रिएका छन्। एक अध्ययनले यसको उपयोगबाट वार्षिक करिब दुई अर्ब डलर आर्जन गर्न सकिने सम्भावना देखाएको छ।' ढकालले भने।
विगत १५ वर्षमा आधा घटेको अर्थतन्त्रमा उत्पादनमूलक उद्योगको हिस्सा बढाउन विशेष कार्यक्रम आवश्यक रहेको उनको भनाइ छ।
साना तथा मझौला उद्यम प्रवर्द्धन गर्न परियोजना कर्जा, करमा सहुलियत, बजार विविधीकरणमा सहयोग पुर्याउनु पर्ने भन्दै साना उद्यमको संरक्षण दिगो अर्थतन्त्रको निर्माण हुने उनले बताए।
उनले क्ष जनशक्ति उत्पादनमा हामीले विशेष ध्यान दिनु पर्ने उनको भनाइ छ। 'नेपाल श्रम शक्ति सर्वेक्षणले मुलुकमा ११ प्रतिशत पूर्ण बेरोजगारी देखाएको छ। अर्ध बेरोजगारी त धेरै बढी छ। यता, उद्योग व्यवसायले दक्ष जनशक्ति पाइरहेका छैनन्। वैदेशिक रोजगारीमा जाने ७४ प्रतिशत युवा अदक्ष छन्। त्यसैले आय बढाउन दक्षता बढाउनु आवश्यक छ।' उनले भने।
