विन बहुउद्देशीय सहकारी संस्थाले व्यापार मेला (ट्रेड फेयर) आयोजना गर्ने भएको छ।
सहकारीले साउन २६, २७ र २८ गते १४औं संस्करणको ट्रेड फेयर २०८० आयोजना गर्न लागेको हो।
महालक्ष्मीस्थानस्थित डिलाइट पार्टी भेन्युमा हुने व्यापार मेलामा ५१ वटा स्टलहरू रहने छन्।
मेलामा सहकारीका सदस्य महिला तथा अन्य व्यक्तिगत महिला उद्यमीले तयार पारेका चाँदी तथा धातुका गरगहना, प्राकृतिक रेशा, नेपाली कागज, पस्मिना, फेल्ट, उनी, काष्ठ, पोते, नेपाली ढाँका, कपडा, अचार, चटनी, अष्टमण्डल, क्वाटी, चकलेट, फुरनदाना, क्याण्डी, तितौरा, मस्यौरालगायत नवरस ब्राण्डका सामग्री प्रदर्शनी हुने सहकारीले जानकारी दिएको छ।
मेलालाई अझै आकर्षक बनाउन विन बहुउद्देशीयले गिफ्ट भौचर, उपहार, निःशुल्क वाइफाई, निःशुल्क मास्क, निःशुल्क चिया, खानेपानी, विभिन्न जिल्लाका रैथाने उत्पादन, खाजाका स्टल, फेस पेन्टिङ, नेल पेन्टिङ, मेहेन्दी लगायतको व्यवस्था गरेको छ।
उक्त सहकारीले महिलाहरूलाई उद्यमी बनाउन बेसिकदेखि एडभान्ससम्मको विभिन्न तालिम सञ्चालन गर्दै आएको छ।
तालिममा सहभागीले बनाएका उत्पादनको प्रवर्द्धन गर्न मेलामा प्रदर्शनी र प्रतियोगिताको समेत आयोजना हुने सहकारीले जनाएको छ।
यसका साथै महिला उद्यमशीलता तालिमका नयाँ उत्पादन अष्टमण्डल, बेकरी, क्यान्डी, तितौरा, अचार र स्न्याक्स पनि मेलामै सार्वजनिक हुने बताइएको छ।
तीन दिनसम्म चल्ने मेला १० देखि १५ हजारले अवलोकन गर्ने र ५० देखि ७५ लाख रुपैयाँसम्मको कारोबार हुने अपेक्षा गरिएको छ।
विन बहुउद्देशीय सहकारी संस्था महिलाहरूको सामाजिक तथा आर्थिक विकास गर्ने उद्देश्य लिएर सन् १९९१ मा सहकारी ऐन अन्तर्गत स्थापना भएको बजारीकरण गर्ने नेपालकै पहिलो सहकारी संस्था हो।
संस्थाले स्थापना कालदेखि नै आफ्ना महिला सदस्यका साथै उनीहरूको सहभागीतामा सञ्चालित उद्योग व्यवसायबाट उत्पादन गरिएका वस्तु एवम् सेवाहरूलाई स्वदेश तथा विदेशमा बजारीकरण गर्दै बताएको छ।
