चौधरी ग्रुपका अध्यक्ष एवं सांसद विनोद चौधरीले कुनै पनि बहानामा हाम्रा बालबालिका शिक्षाबाट वञ्चित हुन नहुने बताएका छन्।
भारतका ‘द पोलिसी टाइम्स’ र ‘शिव नादर युनिभर्सिटी’द्वारा आयोजित ‘वल्ड एजुकेसन कन्फ्ररेन्स–२०२१’ मा प्रमुख अतिथिको रूपमा बोल्दै चौधरीले विश्वभरका मानवको जीवनस्तर उकास्न गुणस्तरीय शिक्षामा केन्द्रित हुनुपर्ने बताए।
ठूला व्यापारिक संस्थाले सामाजिक उत्तरदायित्वका रूपमा गुणस्तरीय शिक्षाका लागि सघाँउने हो भने मानव विकासको फड्को मार्न सकिने उनको भनाइ छ।
‘व्यक्तिको मौलिक हकका रूपमा रहेको शिक्षाले संसार चिहाउने बाटो देखाउँछ,’ उनले भने, ‘व्यक्तिगत र पेसागत जीवनमा आउने वैराग्यको अवस्थामा पनि उज्यालो किरण देखाउने काम शिक्षाले गर्छ। त्यसैले गुणस्तरीय शिक्षाको अर्को कुनै विकल्प छैन।’
‘पेशा, व्यवसाय गर्नमात्र होइन, राम्रो शिक्षाले जीवनलाई सुन्दर बनाउँछ। जीवनप्रतिको दृष्टिकोण नै बदलिदिन्छ’, उनले थपे।
सीजी कर्प ग्लोबलअन्तर्गतको सीजी एजुकेसनले नेपाल, भारतलगायत एसिया र अन्य मुलुकमा गुणस्तरीय शिक्षाका लागि परोपकारी काम गर्दै आएको पनि चौधरीले बताए।
चौधरी फाउण्डेसनले नेपालमा डिजिटल क्लास रूम कार्यक्रम सञ्चालन गर्दै आएको छ।
नेपाली बालबालिकालाई विश्वब्यापी आधुनिक शिक्षा प्रणालीमा आवद्ध गर्न, सूचना र शिक्षाको पहुँचमा पुर्याएर उनीहरूलाई विश्वब्यापी रुपमा प्रधिस्पर्धी बनाउन यो कार्यक्रम लागू गरिएको हो।
सम्मेलनअन्तर्गत ‘राष्ट्रिय शिक्षा नीति २०२०— शिक्षाको भविष्य र कार्यान्वयनको मार्गचित्र (एनईपी)’ नामक सत्रमा अध्यक्ष चौधरीको आत्मकथा ‘मेकिङ इट बिग’सँगै उनको जीवनबारेमा चर्चा गरिएको थियो।
