लकडाउनपछि पहिलोपटक म्यानमारबाट नेपालीहरु स्वदेश फर्किने भएका छन्। नेपाल नागरिक उड्डयन प्राधिकरणका प्रवक्ता राजकुमार क्षेत्रीका अनुसार म्यानमारको एयर फोर्सको जहाजले २६ जना यात्रु ल्याएर भोलि काठमाडौं आउने छ। फर्किंदा भने ४१ जना लिएर जाने तालिका रहेको छ।
जहाज भने दुईओटा आउने उनले जानकारी दिए।
यसैबीच सयुक्त अरब इमिरेट्सबाट नेपाली आउने भनेको उडान भोलिका लागि अनिश्चित भएको छ। पहिलो चरणमा युएई सरकारले एयर अरेबिया मार्फत् नेपाली फिर्ता पठाउने प्रस्ताव गरिएको थियो।
एयर अरेबियाले उडान अनुमतिका लागि नेपाल नागरिक उड्डयन प्राधिकरण तथा विमानस्थलमा आवेदन गरेको भएपनि अन्तिममा पर्यटन मन्त्रालयको असहमति भएपछि तत्काल अनिश्चित भएको छ।
नेपाली फर्काउनका लागि नेपाली एयरलाइन्स नै प्रयोग हुनुपर्ने मन्त्रालयको अडानपछि उक्त प्रक्रिया रोकिएको छ। यो प्रक्रिया रोकिएपछि परराष्ट्र मन्त्रालयका प्रतिनिधिले सिसिएमसीको बैठकमा एयर अरेबियाको उडान निशु:ल्क भएकाले अनुमति दिन प्रस्ताव गरेका थिए।
'तर हामीले यसमा सहमति जनाएका छैनौ। कामदारले पैसा तिर्नुपर्ने नभएपनि उडान निशु:ल्क हुँदैन। त्यो कुरा हामीलाई पनि थाहा छ। हाम्रै एयरलाइन्स व्यापार नपाएर बसिरहेको बेला अरुलाई व्यापार दिन सकिंदैन' संस्कृति पर्यटन तथा नागरिक उड्डयनमन्त्रालय निकट स्रोतले भन्यो।
