उद्योगी व्यवसायीहरुले कोरोना भाइरसबाट असर परेको अर्थतन्त्रलाई सहयोग पुर्याउने गरी बजेट आएको प्रतिक्रिया दिएका छन्।
अर्थमन्त्री डा. युवराज खतिवडाले आज आगामी आर्थिक वर्षका लागि १४ खर्ब ७४ अर्ब रुपैयाँको बजेट घोषणा गरेका थिए।
नेपाल चेम्बर अफ कमर्सका अध्यक्ष राजेशकाजी श्रेष्ठले कोरोनाको संक्रमणबाट मानव जीवन बचाउने गरी बजेट आएकोले स्वागत योग्य भएको बताए।
उत्पादनका लागि आउनुपर्ने कार्यक्रम भने अपेक्षा अनुसार आउन नसकेको उनको भनाइ छ। यस्तै कृषि, उत्पादन, रोजगारी सबै क्षेत्रलाई समेटिएको तर कार्यान्वयनमा अझैपनि आशंका गर्ने ठाउँ रहेको उनले बताए।
कोरोनाबाट अर्थतन्त्रमा पर्ने असरका लागि छुट्याएको रकम ५० अर्ब रकम न्यून भएको उनले बताए। कोरोनाबाट भएको क्षति कम गर्न सबै क्षेत्रलाई समेटिए पनि विनियोजन गरेको बजेट अझै अपुग हुने उनको भनाइ छ। उनले उद्योगी व्यवसायीको सुझाव अनुसार नै विद्युतमा छुट दिइएको बताए।
नेपाल उद्योग परिसंघका अध्यक्ष सतिस मोरले बजेट लगानी अभिवृद्धि गर्ने विषयमा केन्द्रित भएको बताए। रोजगारी सिर्जनाका लागि लगानी बढाउने विषयमा आएका विषयहरु राम्रो भएको उनले बताए।
बाहिरबाट आउने व्यक्तिहरुलाई कृषिमा लगाउने र कृषिलाई आधुनिकीकरण गर्ने विषय समेत समावेस भएको उनले बताए। स्वास्थ्य क्षेत्रमा कसरी अगाडि बढ्ने विषय समेत प्रष्टसँग समेटिएको उनले बताए। यद्यपी विस्तृतमा अध्ययन गरेपछि परिसंघले आफ्नो धारणा बनाउने उनको भनाइ छ।
होटल संघका पूर्व अध्यक्ष विनायक शाहले कोरोना भाइरसका कारण सबैभन्दा बढी संकटमा परेको पर्यटन क्षेत्रको पुर्नरुत्थानका लागि बजेटले उपयुक्त कार्यक्रम ल्याएको बताए। होटल क्षेत्रमालगायत समग्र पर्यटन क्षेत्रको पुर्नरुत्थानका लागि बजेटले धेरै कुरा समेटेको उनले बताए।
व्यवसायीहरुको ऋणको ब्याज र साँवा तिर्नका लागि ५ प्रतिशत ब्याजदरमा उपलब्ध गराउने गरी ५० अर्बको पुनरुत्थान कोष र एक खर्बको पुनर्कर्जा कोष ल्याउनु सकारात्मक भएको उनको भनाइ छ। यस्तै उद्योग तथा प्रतिष्ठानमा काम गर्ने कर्मचारीको लागि समेत उचित व्यवस्था गरिएको बताए।
कर र महसुल छुटका कुरा पनि सकारात्मक रहेको उनले बताए। ‘आन्तरिक पर्यटन विकासका लागि देश दर्शनको कार्यक्रम ल्याइएको छ, एयरपोर्टको स्तरोन्नती गर्ने, पर्यटनका नयाँ गन्तव्य विकास गर्ने लगायतका कुरा आएकाले बजेट स्वागत योग्य छ’ उनले भने।
नीति कार्यक्रमहरु राम्रो आएको तर कार्यान्वयन पक्षमा चुनौति रहेको उनले बताए।
