अमेजनका मालिक जेफ बेजोसले भारतमा ठूलो लगानी गर्ने भएका छन्।
बेजोसले भारत मुख्य विकास बजार भएको बताउँदै साना तथा मझौला अनलाइन व्यवसायका लागि एक अर्ब डलर लगानी गर्ने घोषणा गरेका हुन्।
नयाँ दिल्लीमा कम्पनीले आयोजित गरेको कार्यक्रममा बोल्दै उनले २१ औं शताब्दी 'भारतीय शताब्दी' हुने बताए।
उनको तीन दिने भारतीय भ्रमणमा प्रदर्शकबाट विरोध हुने अपेक्षा गरिएको छ।
भारतका तीन सय सहरका हजारौं व्यापारीहरूले अमेजनले स्थानीय बजारमा नकारात्मक प्रभाव परेको भन्दै विरोध गर्ने योजना बनाएको बीबीसीले जनाएको छ।
उनीहरूले अमेजनले सामानमा भारी छुट गर्दै र केही ठूला व्यापारीलाई ठाउँ दिँदै आफूहरूलाई व्यवसायबाट बाहिर निकालेको आरोप लगाएका छन्।
अमेजनले भने यो आरोप गलत भएको दाबी गरेको छ।
'गतिशीलता, उर्जा.... वृद्धि। यो देशसँग केही विशेष छ- र यो प्रजातन्त्र हो,' बुधबारको सम्बोधनमा बेजोसले भने।
उनले अमेजनले सन् २०२५ सम्ममा १० अर्ब डलर बराबरको सामान निर्यात गर्ने र यसले ५.५ अर्ब डलर भारतमा लगानी गर्ने प्रतिवद्धता गरिसकेको बताए।