उद्योगी व्यवसायीहरुले कर्जा र निक्षेपको व्याजदर अन्तर (स्प्रेड दर) ३ प्रतिशत कायम हुनेगरी मौद्रिक नीति ल्याउन नेपाल राष्ट्र बैंकलाई सुझाव दिएका छन्।
निक्षेपको व्याजमा बन्देज लगाइँदा पनि कर्जाको व्याजदर नघटेको भन्दै उद्योगीहरुले स्प्रेड दर घटाउन सुझाव दिएका हुन्।
नेपाल उद्योग वाणिज्य महासंघकी अध्यक्ष भवानी राणाले कर्जा र निक्षेपको व्याजदरको अन्तर ३ प्रतिशत कायम हुने गरी मौद्रिक नीति ल्याउन नेपाल राष्ट्र बैंकलाई सुझाव दिइन्।
सोमबार नेपाल राष्ट्र बैंकले मौद्रिक नीतिका सम्बन्धमा काठमाडौंमा आयोजना गरेको अन्तरक्रिया कार्यक्रममा बोल्दै उनले भूकम्पले क्षति पुर्याएका उद्योगहरुलाई अनुदान दिने सरकारको निर्णय कार्यान्वयनमा लैजान राष्ट्र बैंकको ध्यानाकर्षण गराइन्।
त्यस्तै पुर्नकर्जा कोषको रकम बढाएर १ सय अर्ब पुर्याउन उनले आग्रह गरिन्।
नेपाल चेम्बर अफ कमर्शका वरिष्ठ उपाध्यक्ष कमलेशकुमार अग्रवालले मुलुकको आर्थिक विकासका लागि भारतबाट आयात हुने बस्तुहरुको दायरा बढाउने गरी मौद्रिक नीति ल्याउनुपर्ने बताए।
उनले भारतीय नोटहरु पनि नेपालमा प्रयोगमा ल्याउन सकिनेगरी व्यवस्था गर्न राष्ट्र बैंकलाई सुझाव दिए। भारतीय नोट प्रयोगमा ल्याउँदा भारतीय पर्यटकलाई सहजता हुने र पर्यटन क्षेत्रमा टेवा पुग्ने उनको भनाई छ। त्यस्तै बैंकहरुले कर्जाको व्याजमा निश्चित अधिकतम सीमा तोक्नुपर्नेमा उनले जोड दिए।
बैंकर अनलराज भट्टराईले नेपालमा लगानी भित्र्याउन गैर आवासीय नेपालीले पनि विदेशमै रहेर नेपालमा बैंकिङ कारोबार गर्ने व्यवस्था हुने गरी मौद्रिक नीति ल्याउन सुझाव दिए। उद्योगीहरुले उत्पादनशील क्षेत्रमा लगानी बढाउने गरी मौद्रिक नीति ल्याउनुपर्नेमा पनि जोड दिएका थिए ।
