साउनदेखि मंसिरसम्म देशले कुल ६ खर्ब ७ रुपैयाँ बराबरको बस्तु आयात गरेको छ। गत वर्षको यस अवधिमा भन्दा वस्तु आयात ३४.२ प्रतिशतले बढेको छ। अघिल्लो वर्षको सोही अवधिमा यस्तो आयात १८.२ प्रतिशतले बढेको थियो।
मुलुकका आधारमा भारतबाट ३१.७ प्रतिशत, चीनबाट ४७.७ प्रतिशत र अन्य मुलुकबाट ३३.७ प्रतिशतले आयात बढेको छ। वस्तुगत आधारमा पेट्रोलियम पदार्थ, सवारी साधन तथा पार्टस, हवाईजहाज तथा पार्टपुर्जा, एम.एस. बिलेट, अन्य उपकरण तथा पार्टपुर्जा, तरकारी, फलफूल तथा चामलको आयात बढेको छ।
यस अवधिमा निर्यात भने जम्मा ११.२ प्रतिशतले मात्रै बढेको छ। पाँच महिनामा ३७ अर्ब ५० करोड रुपैयाँको बस्तु निर्यात भएको राष्ट्र बैंकको वित्तीय विवरणले देखाउँछ।
अघिल्लो वर्षको सोही अवधिमा यस्तो निर्यात १०.१ प्रतिशतले वृद्धि भएको थियो। गन्तव्यका आधारमा भारततर्फ २०.७ प्रतिशत र अन्य मुलुकतर्फ ३.० प्रतिशतले निर्यात बढेको छ भने चीनतर्फ ३०.७ प्रतिशतले कमी आएको छ।
वस्तुगत आधारमा पोलिष्टर यार्न, जस्तापाता, कार्पेट, गेडागुडी, तयारी पोशाक, पश्मिना, जुटका सामान लगायतका वस्तुको निर्यात बढेको छ भने अलैची, रोजिन, छाला, जुत्ता र चप्पल लगायतका वस्तुहरुको निर्यात घटेको छ।
पाँच महिनामा कुल वस्तु व्यापार घाटा ३६.१ प्रतिशतले बढेर ५ खर्ब ६९ अर्ब ४९ करोड पुगेको छ। समीक्षा अवधिमा निर्यात–आयात अनुपात ६.२ प्रतिशत कायम भएको छ। अघिल्लो वर्षको सोही अवधिमा उक्त अनुपात ७.५ प्रतिशत रहेको थियो।
कार्पेट, पश्मिना, तामाको पाता, कच्चा धागो, घ्यूलगायतका वस्तुहरुको मूल्य बढेको कारण निर्यात मूल्य सूचकाङ्कमा वृद्धि भएको राष्ट्र बैंकले जनाएको छ। त्यस्तै पेट्रोलियम पदार्थ, सवारी साधन, टायर, ऊन लगायतका वस्तुहरुको मूल्य बढेका कारण आयात मूल्य सूचकाङ्कमा वृद्धि भएको हो।