आइएमइ ग्रुपका अध्यक्ष तथा नेपाल उद्योग वाणिज्य महासंघका उपाध्यक्ष चन्द्र ढकालले कर छली गर्ने उद्देश्यले विदेशमा कुनै पनि कम्पनी नखोलिएको बताएका छन्। सेन्टर फर इन्भेष्टिगेटिभ जर्नलिज्म (सिआइजे) ले सार्वजनिक गरेको रिपोर्टमा आफ्नो ग्रुपको नाम उल्लेख भएको भन्दै उनले गैरकानुनी रुपले कुनै पनि कम्पनी विदेशमा नखोलिएको प्रष्ट पारेका छन्।
सिआइजेले प्रकाशित गरेको रिपोर्टमा व्यवसायी चन्द्र ढकालले बेलायतमा कम्पनी खोली कर छल्ने प्रयत्न गरेको बताइएको छ। ढकालले आज काठमाडौंमा पत्रकार सम्मेलन गरी आफ्नो ग्रुपको कुनै पनि स्वीस बैंकमा खाता र कर छुट हुने मुलुकमा कम्पनी दर्ता नभएको प्रष्ट पारे।
‘हाम्रो कुनै पनि स्वीस बैंकमा खाता छैन। कुनै पनि ट्याक्स हेभन मुलुकमा कम्पनी दर्ता छैन र हाम्रो समूहले प्रवर्द्धन गरेका कुनै पनि कम्पनीमा ट्याक्स हेभन मलुकबाट लगानी पनि आएको छैन,’ ढकालले भने, ‘कानुनले दिएका अधिकार प्रयोग गरी पूरै प्रक्रिया पालना गरेर बेलायतमा खोलिएको एउटा कम्पनीको विषयलाई जोडेर हामीमाथि भ्रम सिर्जना गरी हाम्रो सार्वजनिक छविमा क्षति पुगेको छ। यसमा हाम्रो आपत्ति छ।’
उनले बेलायतमा कम्पनी दर्ता हुनुलाई स्वीस बैंकमा खाता हुनु, कर छल्नुसँग जोड्न खोजिएको भन्दै आपत्ति जनाए।
ढकालले बेलायतमात्र होइन विश्वका अन्य मुलुकमा पनि आइएमइको प्रतिनिधि कार्यालय खोलिएको र त्यहाँका कतिपय कम्पनीमा आफैं संचालक भएको बताए। यसरी कम्पनी खोल्दा र संचालक बस्दा कानुनको अख्तियारीभित्र रही सरकारी अनुमति लिइएको उनको भनाइ छ।
‘हामीले नेपाल राष्ट्र बैंकको अनुमति लिएर रेमिट्यान्स सेवा दिन १७ जुन २००२ मा बेलयातमा कम्पनी स्थापना गरका हौं। त्यतिबेला म आफैं संचालक थिएँ। तर अहिले त्यसमा म छैन,’ उनले भने, ‘अहिले पनि केही समयअघि ग्लोबल आइएमइ बैंकको प्रतिनिधि अफिस बेलायत, अष्ट्रेलिया तथा भारतमा खोलिएको छ। त्यहाँका कम्पनी रजिष्ट्रार कार्यालयमा हेरेपछि म आफैं संचालक छु। यो कुरा हामीले वेबसाइटमै राखेका छौं।’
कानुनले दिएको अधिकार प्रयोग गरी नियमक निकायको अनुमति लिएर विदेशमा एक डलरको कम्पनी खोलिएको विषयलाई लिएर कर छली र पुँजी पलायनको आरोप लगाउनु बान्छनीय नभएको उनको भनाइ छ।
‘नेपालीहरू कामका लागि विदेश जाने क्रम बढेसँगै हामीले सन् २००२ मा मलेसियाबाट रेमिट्यान्स औपचारिक च्यानलबाट ल्याउने प्रक्रिया सुरु गर्यौं। त्यो पनि राष्ट्र बैंकको अनुमति लिएर पछि विस्तारै नेपालीहरूको बाहुल्य रहेका देशमा हामीले आइएमइको शाखा विस्तार गर्दै गयौं। यसले गर्दा रेमिट्यान्सलाई औपचारिक च्यानल दिन कानुनको अख्तियारीभित्र रहेर काम गर्दा कसरी कर छली वा कालोधन सेटलमेन्ट भयो?’ उनले प्रश्न गरे।
सिआइजेको रिपोर्टमा उल्लेख भएको कम्पनीमा देखाइएको आफ्नो संलग्नता सुरुमा भए पनि सन् २०१० मा राजिनामा दिएर आइएमइको वैदेशिक व्यवसायको जिम्मेवारी आफ्ना भाइ हेमराज ढकालले लिइरहेको बताए।