चिनियाँ टेलिकम कम्पनी हुवावेकी प्रमुख आर्थिक अधिकृत र उपाध्यक्ष सरविना मेङ वानजाउलाई क्यानडाको अदालतले धरौटीमा रिहा गर्न आदेश दिएको छ।
डिसेम्बर १ मा क्यानडा सरकारले उनलाई पक्राउ परेसँगै ट्रम्प-सी भेटपछि सुध्रन लागेको चीन र अमेरिका सम्बन्ध फेरि चिसिएको थियो।
यसबीचमा चीन सरकारले कुटनीतिक दबाब दिएको थियो।
चीनका उपविदेश मन्त्री ले यूचेङले आइतबार बेइजिङस्थित अमेरिकी राजदूत टेरी ब्रान्सटाडलाई डाकेर मेङ पक्राउबारे जानकारी लिएका थिए।
भेटका क्रममा उपविदेशमन्त्री लेले मेङलाई सुपुर्दगी गर्नुपर्ने अमेरिकी मागबारे आपत्ती जनाएको चिनियाँ संचालमाध्यमले उल्लेख गरेका थिए।
‘अमेरिकाले जे गरेको छ त्यसले चिनियाँ नागरिकको जायज र वैधानिक अधिकारको उल्लंघन गरेको छ, र यो उल्लंघन गम्भीर प्रकृतिको छ,’ लेलाई उद्धृत गर्दै चाइना डेलीले लेखेको छ।
यसअघि लेले बेइजिङस्थित क्यानडेली राजदूत जोन म्याकलमलाई पनि डाकेर घटनाबारे जानकारी लिएका थिए।
अमेरिकाको आग्रहमा क्यानडाले मेङलाई पक्राउ गर्नु उनको अधिकारको गम्भीर हनन भएको भन्दै क्यानडेली राजदूतसँग उपमन्त्रीलेले यो निच काम भएको बताएका थिए।
हुवावेका संस्थापक रेन झेङफेईकी छोरी मेङलाई डिसेम्बर १ तारिखमा मेक्सिको जान लाग्दा क्यानडाको भ्यानकुवरबाट पक्राउ गरिएको थियो। उनलाइ मंगलबार अदालतले ७५ लाख अमेरिकी डलरमा धरौटीमा रिहा गर्न आदेश दिएको छ।
उनको रिहाईमा अदालतले कठोर शर्तहरु राखेको छ। बेलुका ११ बजेदेखि विहान ६ बजेसम्म अनिवार्य घरमै बस्नुपर्ने, सुरक्षा निगरानी गर्ने जस्ता शर्तहरु राखिएको छ।
अमेरिकाले प्रतिबन्ध लगाएको इरानमा टेलिकम्युनिकेशन सामग्री पठाएको भन्दै अमेरिकाले मेङलाई पक्राउ पुर्जी जारी गरेको थियो।
यसअघि यस्तै मुद्दामा अर्को चिनियाँ कम्पनी जेटिईलाई पनि अमेरिकाले जरिवाना तिराएको थियो।
मेङलाई अमेरिका सुपुर्दगी गर्नेबारे सोमबार क्यानडाको अदालतमा सुनुवाइ हुने छ। यो रिहाइबाट सुपुर्दगीको सम्भावना टरेको भने छैन।
४६ वर्षीया मेङले आफू उच्च रक्तचापको बिरामी भएकाले धरौटीमा रिहा हुनुपर्ने बताएकी थिइन्।
अमेरिकाले लगाएको आरोपबारे पनि आफूलाई थाहा नभएको उनको दाबी छ।
यो पनि हेर्नुहोस् :
जसको पक्राउले चिसियो अमेरिका-चीन सम्बन्ध, खस्कियो विश्व सेयर बजार
