पुसको आदाआदीसँगै जाडो बढेको छ।
जाडोलाई छिचोल्न मानिस आवश्यक उपकरण किन्न बजार धाउन थालेका छन्। बजारमा जाडो लक्षित न्यानो कपडासँगै विभिन्न आधुनिक उपरकरण आइसकेका छन्।मङ्सिरको सुरूवातदेखिनै जाडो महिनामा आवश्यक पर्ने ग्याँस गिजर, हिटर, एसी लगायतका विद्युतीय उपरकरणको माग बढेको व्यापारीहरू बताउँछन्।
जाडोमा मानिसहरु न्यानोका लागि हिटर किन्ने गर्दछन्। विशेषगरि बालबालिका र वृद्धवृद्धा भएका घरमा हिटरको बढी खपत हुन्छ।
अहिले बजारमा ग्यास, विजुली तथा दुबैबाट चलाउन मिल्ने हाइब्रिड किसिमका विभिन्न डिजाइनका हिटरहरु बजारमा पाइन्छन्।
ती अन्तर्गत ग्यास हिटर, फ्र्यान हिटर र रड हिटर गरी तीन प्रकारका हिटर बजारमा आएको पुल्चोकमा रहेको एनकेएस इलेक्ट्रिक एण्ड इलेक्ट्रोनिकस्का व्यापारी कृष्ण महर्जनले बताए।
उनले भने, ‘ग्यासबाट चल्ने हिटरले रड हिटरले भन्दा बढी तातो दिने गर्दछ। सुत्केरी अथवा बिरामी रहेका ठाउँमा कोठा धेरे तातो गर्न ग्यास हिटर प्रयोग गरिन्छ। साथै सामान्य चिसोबाट बच्न रड हिटर प्रयोग गरिन्छ।’
अहिले विजुलीबाट चल्ने फ्रयान हिटर बजारमा आएको छ। यसले तातो हावा फाल्ने गर्दछ। यो खुल्ला स्थानमा प्रयोग गर्न सकिन्छ।
बजारमा पाइने क्वाट्स नामक हिटर फ्र्यान हिटर अन्तर्गत पर्दछ। हेलोजन नामक हिटर भने रड हिटर अन्तर्गत पर्ने महर्जन बताउँछन्।
उनका अनुसार कोइलाबाट चल्ने गार्डेन हिटर भने अहिले खास्सै बजारमा पाइँदैन। नयाँ नयाँ आधुनिक हिटर बजारमा आएकाले यस प्रकारको हिटर ग्राहकको रोजाईमा नपर्ने उनको भनाइ छ।
अहिले बजारमा न्यूनतम ७ सय देखि ८ हजार सम्म मूल्य पर्ने हिटरहरु बजारमा उपलब्ध छन्। उनका अनुसार विजुलीबाट चल्ने हिटरको मूल्य ७ सय देखि २ हजार २२ सय सम्म रहेको छ। ग्यासबाट चल्ने हिटरको मूल्य सिङ्गल रडको ग्यास सहित ७ हजार र डबल रडको ८ हजार पर्ने छ। तुलनात्मक रूपमा ग्याँस हिटर बढी टिकाउ हुन्छ।
यसमा हिटरले दिने तापक्रमको क्षमता अनुसार हिटरको मूल्य पर्ने उनले बताए। ‘वाट अनुसार हिटरको मूल्य पर्छ। जति थोरै वाट भयो त्यतिनै मूल्य थोरै र जति धेरै वाट भयो त्यतिनै धेरै मूल्य पर्छ’। उनले भने। बजारमा धेरै कम्पनीका हिटरहरू भएकाले कम्पनी अनुसार मूल्य र वारेन्टी, ग्यारेन्टी निर्धारण गरिएको उनको भनाई छ।
नेपाली बजारमा उपलब्ध हिटरहरु धेरैजसो छिमेकी मुलुक चीन र केही मात्रामा युरोपियन मुलुकबाट आयात हुने गरेको छ।
घर वा कोठा अनुसारको हिटर आवश्यक पर्ने व्यापारी बताउँछन्। सानो कोठा छ भने कम वाटका हिटर र ठूलो कोठा छ भने बढी वाटको हिटर आवश्यक हुन्छ। हिटर प्रयोग गर्ने बेलामा झ्याल अथवा ढोका खुला राख्नु पर्दछ। साथै प्रयोग गरिसकेपछि तत्कालै बन्द गरिसक्नु पर्छ।