नेपाल उद्योग वाणिज्य महासंघले कम्बोडियाका उद्योगी व्यवसायीलाई लगानीका लागि आग्रह गरेको छ। देशमा लगानीको वातावरण बन्दै गएको बताउँदै संघले संभावनाका क्षेत्रहरु औंल्याएको हो।
अध्यक्ष भवानी राणा एवं महासंघका पदाधिकारीहरुले नेपाल भ्रमणमा रहेका कम्बोडिया व्यापार संघको टोलीसँग भेटवार्ता गर्दै कृषि, पर्यटन तथा जलविद्युत क्षेत्रमा लगानीको प्रचुर संभावना भएको बताए।
एसिया प्यासिफिक समिटमा सहभागी हुन कम्बोडिया व्यापार संघका उपाध्यक्ष ओक्न्हा लिम हेङ्गको नेतृत्वमा व्यवसायिक टोली नेपाल आएको हो।
भेटघाटका क्रममा महासंघकी अध्यक्ष राणाले अब सरकार स्थायी हुने बताउँदै लगानीमैत्री वातावरण बन्दै गएको उल्लेख गरिन्।
लगानीसँग सम्बन्धित ऐन नियमहरु सरकारले सुधार गर्दै लगेको राणाले बताइन्। उनले दुई देशका सरकारबीच भएको हवाई सेवा सम्झौताले व्यवसायिक सम्वन्धलाई जोड्न टेवा पुग्ने विश्वास व्यक्त गरिन्।
उक्त अवसरमा कम्बोडिया चेम्बर अफ कमर्सका उपाध्यक्ष लिमले कम्बोडियाली व्यवसायीहरु नेपालमा लगानी गर्न इच्छुक रहेको बताउँदै लगानी नीतिसम्वन्धी जिज्ञासा राखेका थिए।
दुई देशका सरकारबीच भएको हवाई सेवा सम्झौता द्विपक्षीय व्यापार तथा पर्यटनको बिकासमा कोशेढुंगा हुने विश्वास व्यक्त गर्दै उनले निजी क्षेत्र बीचको सम्बन्धलाई पनि मजबुत बनाउने बताए।
छलफल कार्यक्रममा महासंघका उपाध्यक्ष चन्द्र प्रसाद ढकाल, कोषाध्यक्ष ज्ञानेन्द्र लाल प्रधान, पूर्व कार्यकारिणी समितिका सदस्य शंकर प्रसाद पाण्डे, निमित्त महानिर्देशक गोपाल प्रसाद तिवारी एवं वस्तुगत संघका प्रतिनिधिहरुको उपस्थिति थियो।
