विशेष आर्थिक क्षेत्र प्राधिकरणले सप्तरी र सर्लाही गरी दुई जिल्लामा विशेष आर्थिक क्षेत्रको सम्भाव्यता अध्ययन गर्न लागेको छ।
विशेष आर्थिक क्षेत्र प्राधिकरणका महानिर्देशक डा. चण्डिका प्रसाद भट्टले सम्भाव्यता अध्ययन गर्न कल्सल्टेन्टका लागि आइतबार सूचना निकालिएको जानकारी दिए।
‘सूचना अनुरूप आवेदन दिने आवेदकलाई प्राविधिक र फाइनान्सियलका आधारमा मूल्याङ्कन गरेर जसले सस्तो, राम्रो गर्छ त्यसलाई सम्भाव्यता अध्ययनको सम्झौता गरिन्छ’ सेजका महानिर्देशक भट्टले भने।
२ महिनामा भैरहवा सेजमा उत्पादन सुरू
नेपालको पहिलो विशेष आर्थिक क्षेत्र भैरहवा सेजमा अबको दुई महिनाभित्रमा उत्पादन सुरू हुने भएको छ। सेज भित्र सञ्चालन गरिएको पहिलो उद्योग शक्ति मिनरल्सले दूई महिना भित्रमै आफ्नो उत्पादन सुरू गर्ने भएको महानिर्देशक भट्टले जानकारी दिएका छन्।
उनका अनुसार उद्योगले उत्पादन गरेको वस्तु ७५ प्रतिशत भारतमा निर्यात हुनेछ। उक्त सेजमा १८ वटा उद्योगसँग सम्झौता भइसकेको छ ।
प्राधिकरणका अनुसार सेजमा स्थापित उद्योगहरूले आफ्नो उत्पादनको ७५ प्रतिशत उत्पादन निर्यात गर्नुपर्ने अनिवार्य व्यवस्था गरिएको छ।
भैरहवा सेजमा हर्वल प्रशोधन, फुटवेयर, सेन्थेटिक प्लाष्टिक, पाइप, खनिजजन्य र कृषिमा आधारित लगायतका उद्योगहरू रहने छन्।
त्यसैगरी, सिमरा औद्योगिक क्षेत्रमा जग्गा विकासको कार्य ८२ प्रतिशत सकिएको महानिर्देक भट्टले जानकारी दिएका छन्।
‘१४ महिनाको अवधिमा जग्गा विकासको कार्य ८२ प्रतिशत सकिनु भनेको धेरै राम्रो कुरा हो,’ उनले भने, ‘ यही काम सक्न भैरहवा विशेष आर्थिक क्षेत्रलाई ८,९ वर्ष लागेको थियो।’
उनले थपे, ‘१ सय ६३ बिघा जग्गा निमार्ण भइसकेको छ। अबको दुई तीन महिनामै उद्योगीलाई लगानीका लागि प्रक्रिया अघि बढाइने छ।’
