शनिबारबाट बन्द भएका नेपाली कपडा उद्योग अर्थमन्त्री डा. युवराज खतिवडाको आश्वासनपछि आजदेखि खुलेका छन्।
अर्थमन्त्रीले उद्योगको समस्या समाधान गर्ने आश्वासन दिलाएपछि सोमबारबाट उद्योगहरु संचालनमा आएका हुन्। कपडा उद्योग सङ्घका अध्यक्ष शैलेन्द्र प्रधानले अर्थमन्त्रीले १० दिन भित्रमा कपडा उद्योगको समस्या समाधान गर्ने बताएपछि कपडा उद्योग खोलेको बताए।
‘आइतबार अर्थमन्त्रीले बोलाएर १० दिन भित्रमा कपडा उद्योगको सबै समस्या समाधान गर्छौँ, उद्योग खोल्नुस् भनेपछि सोही अनुरूप हामीले खोलेका हौँ ’ प्रधानले सेतोपाटीसँग भने।
उद्योग खोले पनि हड्ताल भने फिर्ता नलिएको उनले बताए। ‘हाललाई स्थगित मात्र गरेका हौँ, यदि १० भित्रमा पनि समस्या समाधान भएन भने बन्द हड्ताल सुरू हुन्छ’ उनले भने।
सरकारले आर्थिक ऐनबाट मूल्य अभिवृद्धि कर छुटको प्रावधान हटाएपछि कपडा उद्योगीले शनिबारबाट उद्योग बन्द गरेका थिए। छुट र सहुलियत विना विदेशी उत्पादनसँग प्रतिष्पर्धा गर्न नसकिने भन्दै उनीहरुले उद्योग बन्द गरेका हुन्।
छुट हटाए पनि बैकल्पिक सहुलियत दिनुपर्ने उनीहरुको माग छ। सरकारले वैकल्पिक व्यवस्था नगरी भ्याट छुटको सुविधा हटाएको विरोधमा लामो समयदेखि स्वदेशी कपडा उद्योगी आन्दोलमा थिए।
भ्याट छुटको सुविधा हटाएपछि संघले सरकारसाग अन्य विकल्पहरू माग गरेको थियो। सो माग पनि सम्बोधन नभएपछि बाध्य भएर उद्योग बन्द गर्नुपरेको संघले जनाएको छ ।
भ्याट छुटको सुविधा हटाएमा सो बराबरको रकम नगद अनुदान उपलब्ध गराउनुपर्ने, नयाँ मेसिन खरिद गर्दा ३० प्रतिशत नगद अनुदान पाउनुपर्ने, पाँच प्रतिशत ब्याजदरमा कर्जा उपलब्ध गराउनुपर्ने, विद्युत महसुलमा ५० प्रतिशत छुट हुुनुपर्ने, उद्योगको मेसिनरी पार्टस् खरिदमा लाग्ने भन्सार छुट हुनुपर्ने, उद्योगले खरिद गर्ने डाइज, केमिकलमा भन्सार छुट हुनुपर्ने, निकासीमा १० प्रतिशत अनुदान, श्रमिक आपूर्तिको भुक्तानीमा नगद अनुदान हुनुपर्ने लगायतका माग उद्योगीले अघि सारेका छन्।
सरकारले आर्थिक वर्ष २०७५/७६ को बजेट र आर्थिक ऐनमार्फत भ्याट फिर्ता तथा छुटको नीति एकमुष्ट रुपमा हटाएको थियो। मुलुकभर रहेका करिब २५० कपडा उद्योगमा दशौं अर्ब लगानी भएको उद्योगी बताउँछन्। कपडा उद्योगहरुमा ५० हजार मजदुर कार्यरत छन्। उनीहरूसँग आश्रित अढाई लाख संख्या रहेको उद्योगीको दावी छ।
नेपालमा वार्षिक एक अर्ब पाँच करोड मिटर पहिरनका कपडा खपत भए पनि स्वदेशी उद्योगबाट जम्मा छ करोड २५ लाख मिटर पहिरनका कपडा उत्पादन हुन्छ। यसबाहेक घरायसी कपडा (तन्ना, पर्दा, तौलिया, सिरकलगायत)को वार्षिक खपत ९० करोड मिटर र औद्योगिक कपडा (ब्याग, सुटकेश, जुत्ता, फर्निचर)मा ३० करोड मिटर खपत हुने गरेको छ।
अर्थमन्त्रीले भने कुनै निश्चित समयका लागि स्वदेशी उद्योगलाई कर छुट लगायतका सहुलियत दिन सकिने भएपनि आजीवन सुविधा दिन नसकिने बताउँदै आएका छन्।
विश्व बजारमा प्रतिष्पर्धी बनाउन र आयात कम गर्न छुट र सुविधा दिन सकिने भएपनि सधैभर छुटको श्रृंखलालाई निरन्तरता दिन नसकिने उनको भनाइ छ।