उद्योग, वाणिज्य तथा आपूर्तिमन्त्री मातृकाप्रसाद यादवले चीन, भारत लगायत सबै मुलुकका लगानीकर्तालाई नेपालमा लगानी गर्न आह्वान गरेका छन्।
चिनियाँं समाचार संस्था सिन्ह्वाले मंगलबार आयोजना गरेको ‘मुन फेस्टिबल २०१८’ लाई सम्बोधन गर्दै मन्त्री यादवले अन्य मुलुकमा भन्दा नेपालमा लगानीको वातावरण राम्रो रहेको बताए।
‘चीन, भारत लगायत सबै मुलुकका लगानीकर्ताका लागि नेपाल उपयुक्त थलो हो । सरकार उहांहरुलाई लगानीका लागि सबै खाले वातावरण तयार गर्न तत्पर छ’ मन्त्री यादवले भने।
मन्त्री यादवले चीनको मुन फेस्टिबलका लागि चीन सरकार र चिनियां जनतालाई बधाई तथा शुभकामना पनि दिए।
‘चीनसंग हाम्रो संबन्ध अत्यन्त हार्दिक छ । सुमधुर छ । हामी यसलाई अझै नयां उचाईमा पु¥याउन चाहन्छौं’ उहांले भन्नुभयो ‘चीनसंग जोडिने रसुवागढी सडकलाई विस्तार गर्न हामी काम गरिरहेका छौं । सरकारले यो कामलाई प्राथमिकतामा राखेको छ ।’
कार्यक्रममा नेपाल चीन चेम्बर अफ कमर्शका अध्यक्ष राजेशकाजी श्रेष्ठले नेपालमा ठूलो परिणामा चीनियां लगानी अझै भित्रिन नसकेको बताए।
‘नेपालमा अझै पनि किन चिनियां लगानी भित्रिन सकेन भन्ने कुरामा हामीले सोच्नुपर्छ’ उनले भने। श्रेष्ठले चिनियां लगानीकर्ताले पनि नेपालका नीतिनियम र कानुन राम्रोसंग बुझ्नुपर्ने बताए।
सो अवसरमा चिनियां लगानीकर्ताका तर्फबाट बोल्दै चिनियां सिएमसि इन्जिनियरिङ् कम्पनीका एसिया प्यासिफीक डिभिजनका साइट म्यानेजर जुन झुले नेपालमा जलबिद्युत्, पूर्वाधार विकास र दुरसंचारका क्षेत्रमा काम गरिरहेको बताए। हाल पोखरा क्षेत्रीय अन्र्तराष्ट्रिय विमानस्थल निर्माणमा संलग्न उनले नेपाली जनतासँग मिलेर काम गर्न नेपालस्थित चिनियां ब्यापारिक समुदाय तयार रहेको बताए।
चीनमा मिड अटम फेस्टिबललाई मुन फेस्टिबल पनि भनिन्छ । चीनमा शरद ऋतुको मध्यमा यो पर्व मनाउने गरिन्छ । चिनियां नयां बर्षपछिको दोश्रो ठूलो चाडका रुपमा यो फेस्टिबललाई लिइन्छ । यस पर्वका अवसरमा चिनियां नागरिकहरु पूर्ण चन्द्रमा हेर्ने, मुनकेक र मिठा परिकार खाने, नाच्ने र गाउने गर्छन् ।
