कहिलेकाहीँ सानो कुरा नहेर्दा ठूलो गल्ती हुन्छ। त्यस्तै गल्ती भएको छ हङकङको हवाइजहाज कम्पनी क्याथे प्यासेफिकमा। यो कम्पनीको एउटा जहाजमा आफ्नै नाम गलत लेखिएको छ।
साउथ चाइना मर्निङ पोष्टका अनुसार बोइङ ७७७-३६७ जहाजमा क्याथे प्यासेफिकको नाम गलत लेखिएको छ। जहाजमा प्यासेफिकको स्पेलिङ PACIFIC हुनुपर्नेमा PACIIC भएको छ।
हङकङ विमानस्थलमा यस्तो नाम लेखिएको जहाज देखिएको फोटोले अहिले सामाजिक सञ्जालमा चर्चा पाएको छ।
क्याथे प्यासेफिकको भगिनी कम्पनी हेइकोका एक इन्जिनियरले यो गल्ती कसरी भयो भन्नै नसकिने बताएका छन्।
‘जहाजमा नाम लेखेको पाता टाँस्ने हो। यदि केही गल्ती भएको भए दुईटा I काबीच खाली ठाउँ हुन्थ्यो। तर त्यस्तो छैन,’ उनले भने।
क्याथे प्यासेफिकले पनि यो गल्तीबारे मजाक गर्दै जवाफ दिएको छ- यो पहिरन लामो समय रहेछैन। सच्याउन लगिएको छ।
यो सच्याउन कति पैसा लाग्छ भन्ने खुलाइएको छैन तर लाखौं रूपैयाँ लाग्ने जनाइएको छ।
