भैरहवा विशेष आर्थिक क्षेत्र (सेज) मा अझै ७ वटा उद्योगले सञ्चालन सम्झौता गरेका छैनन्।
विशेष आर्थिक क्षेत्र प्राधिकरणले सार्वजनिक सूचनामार्फत संचालनका लागि सम्झौता गर्न आह्वान गरेकोमा हालसम्म १७ उद्योगले सम्झौता गरेका हुन् भने बाँकी ७ ले सम्झौता गर्न चासो दिएका छैनन्।
विशेष आर्थिक क्षेत्र प्राधिकरणका सूचना अधिकारी सुन्दर थापा उद्योग सञ्चालन सम्झौता गर्न नआए दर्ता आवेदन नियम अनुसार खारेजी हुने बताउँछन्।
‘अब १५ र ७ दिनको गरेर दुई पटक सूचना निकाल्छौँ, त्यसपछि पनि बाँकी ७ उद्योग सञ्चालन सम्झौता प्रक्रियामा आएनन् भने नियमअनुसार खारेज गछौँ’ उनले भने।
थापाका अनुसार, एक्सल गार्मेन्ट प्रोसेसिङ इन्डष्ट्रिज र किरण सुज प्राविधिक तथा कानुनी समस्याले आएका छैनन्। त्यस्तै गार्मेन्ट प्रोसेसिङ इन्डष्ट्रिज, मिनरल वाटर इन्डष्ट्रिज, एशियन थाई फुडस्, हर्बल सोप र जगदम्बा सेन्थेटिक्स गरी पाँच उद्योगहरू प्राधिकरणको सम्पर्कमै छैनन्।
प्राविधिक तथा कानुनी समस्याले सम्झौता प्रक्रियामा नआएका उद्योगलाई प्राधिकरणले सहयोग गरिरहेको थापा बताउँछन्। दर्ता भएका उद्योगले १ लाख १० हजार ७९ दशमलब ३ बर्गमिटर क्षेत्रफल ओगटेका छन्। ती उद्योगहरूबाट ६ महिनाको अग्रिम भू वहाल शुल्क ६६ लाख ८४ हजार ९ सय ३४ रुपैयाँ प्राप्त भएको प्राधिकरणले जानकारी दिएको छ।
प्राधिकरणका अनुसार शक्ति मिनरलस, एस प्लाष्टिक र नुमेन्टल इन्डष्ट्रिज गरी ३ उद्योगले सबैभन्दा पहिले सम्झौता गरेका हुन्। त्यस्तै एलइडी लाइट, सिद्धार्थ पाइप, सिद्धार्थ पेट, ग्रो व्यल इनोभेसन, नीर इन्डष्ट्रिज, वुद्ध न्याप्किन एण्ड टिस्यु पेपर, सुगम नानो हर्बल, आ.डि.एस. इलेक्ट्रिकल, पञ्चकन्या ग्रुपअन्तर्गतका ४ उद्योग तथा क्रियशन वल्र्ड वाइड उद्योग भैरहवा सेजमा दर्ता भएका छन्।
प्राधिकरणका अनुसार सेजमा स्थापित उद्योगहरूले आफ्नो उत्पादनको ७५ प्रतिशत उत्पादन निर्यात गर्नुपर्ने अनिवार्य व्यवस्था गरिएको छ। भैरहवा सेजमा हर्वल प्रशोधन, फुटवेयर, सेन्थेटिक प्लाष्टिक, पाइप, खनिजजन्य र कृषिमा आधारित लगायतका उद्योगहरू रहने छन्।