नेपाल एयरलाइन्सको पहिलो एयरबस ए३३० वाइडबडी जहाजबाट प्रुभिङ फ्लाइट सम्पन्न गरेको छ। काठमाडौंबाट भारतको नयाँ दिल्लीमा भएको उक्त उडानपछि उक्त जहाजले व्यवासायिक उडानको अनुमति पाउने छ।
अगष्ट १ बाट व्यावसायिक उडान गर्ने भनिएको जहाजको आज उक्त उडान भएको हो। नागरिक उड्डयन नियमनअनुसार जहाजको तोकिएको क्षमताका आधारमा उडान गर्ने नगर्ने, सिट, सेवा खाना, व्यागेजजस्ता विशेषताको प्राविधिक परीक्षण गर्न यस्तो उडान गरिन्छ।
नेपाल नागरिक उड्डयन प्राधिकरणको सिफारिशमा नै निगमको वाइड बडी जहाजले आज त्यस्तो उडान गरेको हो। निगमले उडानका लागि सबै प्रक्रिया पूरा गरेको छ । उक्त उडानमा निगमका प्राविधिक तथा अधिकारी सहभागी थिए।
परीक्षण उडानमा कुनै यात्रु भने बोकिएको थिएन। परीक्षण उडान सफल भएपछि मात्रै व्यावसायिक उडान गर्ने गरी तालिका तय गरिने निगमले जनाएको छ। निगमले यही साउन १६ गते पहिलो व्यावसायिक उडान गर्नेछ।