श्री एयरलाइन्सले काठमाडौंबाट सप्तरीको राजविराज विमानस्थलमा नियमित उडान सुरु गरेको छ। एयरलाइन्सले आजदेखि उक्त रुटमा नियमित उडान सेवा सुरु गरेको जानकारी दिएको छ।
हप्तामा आइतबार, सोमबार, बुधबार, बिहीबार र शुक्रबार उडान गर्नेगरी व्यवासायिक उडान सुरु गरेको एयरलाइन्सका म्यानेजर अनिल मानन्धरले जानकारी दिए। उनका अनुसार एयरलाइन्सले आजको पहिलो फ्लाइटमा काठमाडौं–राजविराज उडानमा ४ नाबलकसहित ४६ जना यात्रुले यात्रा गरेका थिए।
५० सिट भएको सिआरजे २०० जेट विमानबाट पहिलो नियमित उडान गरेको श्रीको राजविराजबाट काठमाडौं आउँदा भने २० जनालेमात्र यात्रा गरेका थिए। श्रीले नियमित उडान गर्दा काठमाडौंबाट राजविराज जाँदा १ः१५ मा जानेछ भने राजविराजबाट काठमाडौं आउँदा २ः१० मा आउने छ।
एयरलाइन्सले यसअघि जेठ ८ गते उक्त विमानस्थलमा परीक्षण उडान गरेको थियो।
यसअघि भद्रपुर, विराटनगर, भैरहवा, नेपालगंज र धनगढीमा दैनिक उडान गरिरहेको श्रीले नयाँ गन्तव्य गरेको छ। एयरलाइन्ससँग ७० सिट भएका सिआरजे ७०० र ५० सिट क्षमताका सिआरजे २०० सिरिजका २÷२ जहाज छन्।