सत्तारुढ नेपाल कम्युनिष्ट पार्टीका सांसदले नयाँ बानेश्वरमा रहेको संसद भवनको गोलाकार पानी ट्याङ्कीलाई फुटबलको स्वरूपमा बदल्न माग गरेका छन्।
प्रतिनिधि सभाको बैठकमा विशेष समय लिएर सांसद विरोध खतिवडाले पानी ट्याङ्कीलाई डिजिटल प्रविधिको प्रयोग गरेर विश्वकप स्वागत गर्दछ भनेर लेख्न माग गरे।
‘विश्वकप फुटबल आयोजना हुँदैछ। भलै नेपाल सहभागी हुन पाएन’, सांसद खतिवडाले भने, ‘संसद भवनमा पानी ट्याङ्की छ। फूटबलजस्तै गोलो छ। माथि चिटिक्क परेको। यसो हेर्दा वर्ल्डकप जस्तो पनि छ। त्यसलाई फुटबल आकार दिएर डिजिटल प्रविधिमार्फत् विश्वकप २०१८ लाई स्वागत गर्दछ भने लेख्यो भने आकर्षक सुहाउँदो हुन्छ र नेपालको सहभागिता पनि हुन्छ।’
विश्वकप फुटबल चार दिनपछि रसियामा सुरू हुँदैछ।