पेट्रोल, डिजेल, मट्टितेल, ग्यास र हवाइ इन्धनको मूल्य फेरि बढ्यो

तस्बिरः नारायण महर्जन


नेपाल आयल निगमले पेट्रोलियम पदार्थको मूल्य फेरि बढाएको छ। निगमको सोमबार साँझ बसेको सञ्चालक समिति बैठकले पेट्रोल, डिजेल, मट्टितेल, खाना पकाउने ग्यास र हवाइ इन्धन गरी सबै पेट्रोलियम पदार्थको मूल्य वृद्धि गर्ने निर्णय गरेको हो ।

निगमले पेट्रोल, डिजेल र मट्टितेलमा प्रतिलिटर एक/एक रूपैयाँ बढाएको छ भने खाना पकाउने ग्यासमा प्रतिसिलिण्डर २५ रुपैयाँ र हवाइ इन्धन आन्तरिकतर्फ प्रतिलिटर ३ रुपैयाँ बढाइएको निगमको प्रवक्ता विरेन्द्र गोइतले जानकारी दिए।

नयाँ मूल्यअनुसार अब पेट्रोल एक लिटरलाई १०२ रूपैयाँ पर्नेछ। डिजेल र मट्टितेलको एक लिटरको मूल्य ७९/७९ रुपैयाँ पुगेको छ। तराईका जिल्लामा भने यो मूल्यभन्दा प्रतिलिटर १ रुपैयाँ ५० पैसा र पोखरा तथा दाङमा ५० पैसा कम पर्छ। दिपायल, सुर्खेत र काठमाडौंको मूल्य भने एउटै हुने निगमले जनाएको छ ।

खाना पकाउने ग्यास प्रति सिलिण्डर १ हजार ३ सय ७५ रुपैयाँ तिर्नुपर्ने हुन्छ। हवाई इन्धन आन्तरिकमा ३ रूपैयाँ बढेर ९० रुपैयाँ प्रतिलिटर पुगेको छ।

नयाँ मूल्य अनुसार अन्तर्राष्ट्रिय तर्फको हवाई इन्धनका पनि प्रति ब्यारेल ५० डलर बढाएर ९ सय डलर बनाइएको छ।

मूल्य समायोजन गरेपछि निगमको मासिक घाटा घटेर २६ करोड ४० लाख रुपैयाँमा झरेको निगमले जनाएको छ ।

निगमलाई अहिले पेट्रोलमा लिटरको २ रुपैयाँ ८३ पैसा नाफा छ। तर, ग्यासमा प्रतिसिलिन्डर २ सय ८ रुपैयाँ घाटा छ। डिजेलमा पनि निगमलाई २ रुपैयाँ ७१ पैसा नाफा छ। भारतीय आयल निगमले नयाँ मूल्यसूची पठाएपछि इन्धनको मूल्य समायोजन गरिएको निगमले जनाएको छ ।

Share:

© 2017 Setopati Sanchar Pvt. Ltd.