मेगा बैङ्क नेपाल लिमिटेडले सल्यानको खलङ्गामा आफ्नो ४८ औँ शाखा विस्तार गरेको छ । यूकेएड सक्षम एक्सेस टु फाइनान्स कार्यक्रमको साझेदारीमा बैंकले सो शाखा स्थापना गरेको हो । मेगा बैङ्क सञ्चालक समितिका सदस्य सीएन पाण्डे र सक्षमका टोली उप–प्रमुख निर्मल दाहालले बुधबार सो शाखाको उद्घाटन गरेका हुन् ।
बैङ्कले सरकारी तथा निजी कार्यालयहरू साथै स्थानीयलाई सेवा प्रदान गर्नेगरी औपचारिक बैङ्किङ सेवाको थालनी गरेको हो । ‘यो त केबल शुरुआत हो । हामीले आगामी वर्षभरिमा करीब २ हजार ग्राहकसम्म पुग्ने लक्ष्य राखेका छौं’, मेगा बैङ्कका सञ्चालक समितिका सदस्य पाण्डेले भने, ‘हाम्रो लघु कर्जा यस क्षेत्रमा साना किसानहरूप्रति लक्षित छ, जसको जीविकोपार्जन कृषि र पशुपालनमा निर्भर छ । यसको अतिरिक्त, पछि गएर हामीले यस शाखाबाट सबै किसिमका विप्रेषण सम्बन्धित सेवाहरू पनि प्रदान गर्नेछौं’ ।
मेगा बैंक सल्यान, खलङ्गामा आफ्नो शाखा खोल्ने दोस्रो निजी वाणिज्य बैङ्क भएको छ ।