पछिल्लो समय डिजिटल कारोबार बढ्दै गएको छ।
यसरी डिजिटल कारोबार सेवा सञ्चालन गर्दा प्रदायक कम्पनीहरुले लिने शुल्कलाई व्यवस्थित गर्न राष्ट्र बैंकले नै सीमा तोकिदिएको छ। भुक्तानी प्रणालीसम्वन्धी एकीकृत निर्देशन जारी गर्दै राष्ट्र बैंकले डिजिटल कारोबारमा सीमा तोकेको हो।
वालेटमार्फत राजश्व भुक्तानी गर्दा सेवा प्रदायक कम्पनीहरुले रकमअनुसार न्यूनतम ५ रुपैयाँदेखि २० रुपैयाँसम्म शुल्क लिन पाउने छन्।
३ हजार रुपैयाँसम्मको कारोबारमा प्रतिकारोबार ५ रुपैयाँ, ३ हजार १ देखि १० हजारसम्म १० रुपैयाँ तथा १० हजार १ भन्दा माथिको कारोबार गर्दा प्रतिकारोबार २० रुपैयाँ शुल्क लाग्छ।
त्यस्तै एउटा बैंकको एटिएम कार्ड अर्को बैंकको एटिएममा प्रयोग गर्दा प्रति कारोबार २० रुपैयाँसम्म शुल्क लिन पाउने पुरानै व्यवस्था कायम गरिएको छ।
पिओएस संचालन गर्ने डिपार्टमेन्टल स्टोर, मार्ट, होटल पसल लगायतले ग्राहकसँग कुनै पनि थप शुल्क लिन पाउँदैनन्।
त्यस्तै मोबाइल बैंकिङमार्फत रकम ट्रान्सफर गर्दा न्यूनतम १० रुपैयाँदेखि ३० रुपैयाँसम्म शुल्क तोकिएको छ।
५० हजार रुपैयाँसम्मको कारोबारमा प्रतिकारोबार १० रुपैयाँ, ५० हजार १ देखि १ लाखसम्म २० र १ लाख १ भन्दा माथिको कारोबारमा ३० रुपैयाँसम्म शुल्क तोकिएको छ।
