नबिल बैंकले नयाँ भेन्चर डीजी बैंकिङ सुरु गरेको छ। स्थापना भएको ३६ वर्षको अवसरमा बैंकले आइतबारबाट डीजी बैंकिङ सुरु गरेको हो।
डीजी बैंकिङ बैंकभित्रको अर्को बैंक हुने भर्चुअल पत्रकार सम्मेलनमा प्रमुख कार्यकारी अधिकृत अनिल शाहले जानकारी दिए।
उनले भने 'बैंकिङको भविष्य डिजिटल होइन, वर्तमान हो।यसकारण हामी डिजिटलमा जान थालेका छौं।'
नविल बैंकले हाल गरिरहेको अनलाइन बैंकिङलाई निरन्तरता दिँदै नयाँ बैंकिङ सेवा उपलब्ध गराउने शाहको भनाइ छ।
'स्थापना कालदेखि पुरानो पुस्तालाई नबिलले ढुक्क बनाएको थियो। अब नयाँ पुस्तालाई नबिलले ढुक्क बनाउने छ', उनले भने, 'अब हामी डिजिटलको डिएनए बन्न चाहन्छौं।'
उनकाअनुसार बैंकले डीजी बैंकिङलाई अघि बढाउन हुवावे कम्पनीसँग रणनीतिक साझेदारी गरिसकेको छ।
सोही पत्रकार सम्मेलनमा हुवावे नेपालका प्रमुख डेनी देङले यस्तो साझेदारीले नेपाली ग्राहकलाई डीजी बैंकिङ पुर्याउन कोशेढुंगाको काम गर्ने दाबी गरे।
बैंकले डीजी बैंकिङलाई अगाडि बढाउन सुरुवात गरिसकेको छ। डीजी बैंकिको प्रमुखमा विनयकुमार रेग्मी छन्। रेग्मी मातहत बैंकले ७२ कर्मचारी छुट्याइसकेको बैंकको भनाइ छ।
अगामि दिनमा डिजी बैंकिङ ठूलो हुने र अहिले गरिरहेको बैंकिङ सानो हुने शाहले जानकारी दिए।
' बैंक अहिलेको अवस्थामा आउन३६ वर्ष लाग्यो', उनले भने,'डीजी बैंकिङलाई ३६ वर्ष लाग्दैन। अब ६ वर्षमै हाम्रो डीजी बैंक निकै ठूलो हुनेछ।'
