बीमा कम्पनीहरुले धान्न नसक्ने अवस्था आएपछि कोरोना बीमा स्थगित भएको छ।
बीमा समितिले एक विज्ञप्ति जारी गर्दै हालसम्म बिक्री भएको दायित्व नै अधिक भएको जनाउँदै पुनर्बीमा समेत गर्नुपर्ने अवस्था आएकाले जेठ २३ गतेदेखि कोरोना बीमा स्थगित गरिएको जनाएको छ।
कार्यकारी निर्देशक राजुरमण पौडेलको हस्ताक्षरमा जारी गरिएको विज्ञप्तिमा बीमक संघले पनि कोरोना बीमालेख स्थगन गर्न पत्र पठाएको उल्लेख गरिएको छ।
बजेटमार्फत सरकारी कर्मचारीको बीमा निशुल्क गरिने व्यवस्था रहेकाले दोहोरिन सक्ने अवस्था रहेकाले कोरोना बीमा स्थगन गरिएको समितिले जनाएको छ। दैनिक कोरोना संक्रमितको संख्या अत्याधिक बढ्दै गएपछि निर्जीबन बीमा कम्पनीहरुले कोरोना बीमा स्थगन गर्न दवाव दिँदै आएका थिए।
विज्ञप्तिमा भनिएको छ ‘बजेट वक्तव्यमा अस्थायी र करार लगायत सबै राष्ट्रसेवकको १ लाख सम्मको कोरोना बीमा निशुल्क गर्ने र १ लाखसम्मको सामुहिक कोरोना बीमा गर्दा लाग्ने वार्षिक बीमा शुल्कमा सरकारले ५० प्रतिशत अदुदान दिने व्यवस्था भएको हुँदा थप बीमा गर्दै जाँदा दोहोरो बीमा हुन सक्ने सम्भावना समेत भएको र हालसम्म बिक्री भएको बीमाको दायित्व अधिक भएकोले पुनर्बीमा समेत गर्नुपर्ने देखिन आएकोले जेठ २३ देखि केही समयको लागि कोरोना बीमा स्थगन गर्ने सोही बमोजिम स्थगन गराउन अनुरोध गरिन्छ।’
बीमा समितिका सूचना अधिकृत निर्मल अधिकारीले हालसम्म करिब ३ लाख जनाले कोरोना बीमा गरेको जानकारी दिए। सोवापत करिब १६ करोड रुपैयाँ संकलन भएको छ।
उनका अनुसार हालसम्म बीमा गरेकाहरुलाई मान्यता दिइने छ।
बजेटले राष्ट्रसेवकको निशुल्क कोरोना बीमा गरिदिने र अन्यलाई ५० प्रतिशत अनुदान दिने व्यवस्था गरेकाले यससम्वन्धी थप स्पष्टता जरुरत पर्ने भएकाले पनि हाललाई स्थगन गरिएको अधिकारीले बताए।
वैशाख ७ गतेदेखि कोरोना बीमा सुरुआत गरिएको थियो। १ लाख र ५० हजार गरी दुई विकल्पमा बीमा गर्न सकिने व्यवस्था गरिएको थियो।
वार्षिक १ हजार रुपैयाँ बुझाउनेले १ लाख र ५ सय रुपैयाँ बुझाउने व्यक्तिले ५० हजार रुपैयाँको कोरोना बीमा गर्न पाउने व्यवस्था थियो।
बीमा गर्नेलाई कोरोना पुष्टि भएपछि सो रकम क्षतिपूर्तिवापत दिने व्यवस्था गरिएको थियो।
