एनआइसी एसिया बैंकको ऋणपत्रमा आवेदन खुलेको छ। बैंकले सोमबारदेखि ‘एनआइसी एसिया डिबेन्चर २०८३/८४’ विक्रीको लागि सार्वजनिक आह्वान गरेको हो।
ऋणपत्रमा लगानी गर्नेले वार्षिक १०.२५ प्रतिशतका दरले ६–६ महिनामा ब्याजदर पाउने छन्। ऋणपत्रको अवधि ७ वर्षको हुने छ।
अंकित मूल्य प्रतिकित्ता १ हजारका दरले ४४ लाख कित्ता अर्थात ४ अर्ब ४० करोडको ऋणपत्र बैंकले निश्कासन गरेको हो। जसमध्ये ६० प्रतिशत अर्थात २ अर्ब ६४ करोड व्यक्तिगत तवरमार्फत् निष्काशन गरिएको छ भने ४० प्रतिशत अर्थात्१ अर्ब ७६ करोड सर्वसाधारण लगानीकर्ताको लागि निष्काशन गरिएको हो।
बिक्री प्रबन्धक सानिमा क्यापिटलका अनुसार छिटोमा साउन ९ गते तथा ढिलोमा असोज ३ गतेसम्म विक्री खुल्ला रहने छ। उक्त ऋणपत्रले इक्रा नेपालबाट ए माइनस र केयर रेटिङबाट एनपी ए ग्रेड पाएको छ। ऋणपत्र नेप्सेमा सूचीकृत हुनेछ।
मुलुकमा हालको दीर्घकालीन लगानीको लागि वित्तीय साधनहरु अत्यन्त कम मात्र उपलब्ध रहेको अवस्थामा दीर्घकालीन रुपमा उच्चतम् प्रतिफल प्राप्त हुने भएकाले सुरक्षित लगानीको लागि यो उत्कृष्ट अवसर भएको बैंकको दावी छ।
बैंकका मुलुकभर २९२ शाखा कार्यालयहरु, ३०२ एटिएम, ५० वटा एक्स्टेन्सन काउण्टर एवं ४१ वटा शाखारहित बैंकिङ्गमार्फत् बैंकिङ्ग सेवा संचालनमा छन्।
बैंकको कुल निक्षेप करिब १ खर्ब ८१ अर्ब तथा कुल कर्जा करिब १ खर्ब ५१ अर्ब पुगेको छ। १७ लाखभन्दा बढी ग्राहक आवद्ध रहेको बैंकको दावी छ।
