गुणस्तरीय ओपिसी सिमेन्ट उत्पादन गरिरहेको अर्घाखाँची सिमेन्टले पिपिसी सिमेन्ट बजारमा ल्याएको छ। आइतबार राजधानीमा एक कार्यक्रम गरी पिपिसी सिमेन्ट बजारमा ल्याइएको हो।
कम्पनीले विगतमा ओेपिसी सिमेन्टमा मात्र उत्पादन गर्दै आएको थियो।
नेपाल सरकारले तोकेको मापदण्ड पुरा गरेको प्रमाणित गरी जेठ २४ गते गुणस्तर तथा नापतौल विभागले कम्पनीलाई एन.एस.चिह्न प्रदान गरेको अर्घाखाँची सिमेन्टका निर्देशक पशुपती मुरारकाले बताए।
‘हामीले एनएस चिह्न समेत प्राप्त गरिसकेका छौं। ग्राहक वर्गले ओपिसी सिमेन्ट धेरै रूचाएको हुनाले ग्राहककै सल्लाह बमोजिम पिपिसी सिमेन्ट पनि बजारमा ल्याइएको हो’, उनले सेतोपाटीसँग भने।
उनका अनुसार ओपिसी सिमेन्ट भन्दा पिपिसी सिमेन्ट एक, डेढ सय रूपैयाँले सस्तो पर्ने छ। अर्घाखाँचीको ओपिसी र पिपिसी सिमेन्टमा ग्राहक नझुकिउन् भनेर प्याकिङ फरक पारिएको उनी बताउँछन्।
ओपिसी निलो र सेतो रङको बोरामा छ भने पिपिसी निलो पहेँलो रङको बोरामा प्याकिङ गरिएको छ। आफ्नै चुनढुङ्गाको खानीबाट क्लिङ्कर बनाइने हुनाले यसको उत्पादनमा एकरूपता हुने उनको भनाइ छ।
यसले एउटै फ्याक्ट्री भित्र छुट्टा छुट्टै प्रोडक्सन लाइन मार्फत ओपिसी र पिपिसी सिमेन्ट उत्पादन गर्दछ।
सरकारले सिमेन्टलाई आत्मनिर्भर बनाउने भनेसँगै उद्योगीहरू अहिले सिमेन्टमा लगानी बढाउन थालेको छन्। यसले रोजगारीको समेत सिर्जना भएको छ।