नयाँ वर्षको अवसर पारेर सबै नेपालीको बैंक खाता अभियान सुरु भएको छ।
राष्ट्रिय सभागृहबाट प्रधानमन्त्री केपी शर्मा ओलीले ‘ज्येष्ठ नागरिक स्वास्थ्य बीमा तथा खोलौं बैंक खाता’ अभियानको शुभारम्भ गरे। आफ्नै बाबुको खाता खोलिदिएर प्रधानमन्त्रीले अभियानको सुरुआत गरे।
सो अवसरमा प्रधानमन्त्री ओलीले आर्थिक समृद्धिका लागि अर्को नयाँ अभियान सुरु भएको दावी गरे। उनले भने ‘अब नेपालमा बैंक खाता नहुने र बैंकमा पैसा नहुने नागरिक भेटिन्नन्।’
प्रधानमन्त्री ओलीले सबैलाई बैंक खाता खोल्न र बैंकबाटै कारोबार गर्न आग्रह गरे। सन्दुक र थैलीमा पैसा राख्ने युगको अन्त्य भएको ओलीको दावी छ।
उनले सबै नागरिकहरुमा बीमाको पनि उत्तिकै महत्व भएको बताए। निरोगीको मात्रै नभई रोगी, बृद्धबृद्धा सबैको बीमा जरुरी भएको उनले बताए।
सबै नेपालीलाई बैंकको पहुँचमा ल्याउने उद्देश्यले सरकारले सबै नेपालीको बैंक खाता अभियान थालेको हो। यही अभियानकै कारण आज सार्वजनिक विदा परे पनि कतिपय बैंकहरु खुल्ला रहेका छन्।
यस कार्यक्रमअन्तर्गत सर्वसाधारणलाई खाता खोल्नका लागि प्रक्रियागत सहजीकरण गरिएको छ। राष्ट्रिय सभागृहमा विभिन्न बैंकहरुले स्टल राखेर अभियानलाई सहयोग गरेका छन्।
नागरिकता, ड्राइभिङ लाइसेन्स, मतदाता परिचयपत्र वा पहिचानको समप्रमाण खुल्ने परिचयपत्रका आधारमा सर्वसाधारणले खाता खोल्न सक्नेछन्। सो परिचयत्रका आधारमा बैंकका कर्मचारीहरुले खाता खोल्न सहजीकरण गर्नेछन्।
पहिले खाता नखोलेकाले यस कार्यक्रमअन्तर्गत खाता खोल्दा खातामै १ सय रुपैयाँ पाउने छन्। यस्तो खाता भएकाले एक पटकमा १ लाख रुपैयाँभन्दा बढी कारोबार भने गर्न पाउने छैनन्। सोभन्दा बढी रकमको कारोबार गर्नु परेमा केवाइसी फारम भर्नुपर्नेछ।
हाल एक व्यक्तिका दुई वा सोभन्दा बढी बैंक खाता हुने गरेकाले तथ्यांकमा बैंकमा खाता खोल्नेको संख्या उल्लेख्य देखिन्छ। राष्ट्र बैंकको तथ्यांकअनुसार फागुन मसान्तसम्म बैंक तथा वित्तीय संस्थाहरुमा २ करोड ५६ लाख बचकर्ताको खाता छ। यद्यपी आधा जनसंख्या अझै वित्तीय पहुँचबाहिर छ।
