त्रिशुली जलविद्युत आयोजना कम्पनीले निश्कासन गरेको सेयरमा आवेदन दिनेले कम्तीमा २० कित्ताका दरले सेयर पाउने भएका छन्।
३० कित्ताभन्दा बढी भने कसेले नपाउने भएका छन्। आवेदकको संख्या अत्याधिक भएपछि एक आवेदकले बढीमा ३० कित्तासम्म मात्रै सेयर पाउने भएको हो।
यस कम्पनीको कर्मचारी तथा सामुहिक लगानी कोषका लागि छुट्याएर ३५ लाख ९३ हजार ८५० कित्ता सेयर सर्वसाधारणका लागि बिक्री खुलाइएको थियो।
जसमा १ लाख ५४ हजार ६२४ आवेदन परेको बिक्री प्रवन्धक ग्लोबल आइएमई क्यापिटलले जनाएको छ। कायम व्यवस्थाअनुरुप सबैले कम्तीमा १ सय कित्ताका लागि आवेदन माग गरेका थिए।
धितोपत्र बोर्डको नयाँ व्यवस्थाअनुसार पुगेसम्म सबैलाई समान रुपमा न्यूनतम १० कित्ताका दरले सेयर दिनुपर्ने व्यवस्था छ। यस कम्पनीको सबैलाई २० कित्तासम्म सेयर दिन पुग्छ। सबैलाई २० कित्ता सेयर दिएपछि ५ लाख १ हजार ३७० कित्ता बाँकी रहन्छ। जुन सेयर बढीमा पुनः १० कित्तासम्मका दरले बाँडफाँड हुन सक्छ।
सबैलाई २० कित्ता दिएर बाँकी रहेको सेयरमा १० कित्ताका दरले बाँडफाँड भएमा ५० हजार १ सय ३७ जनाले कुल ३० कित्ताका दरले सेयर पाउने छन्।
यदी १० कित्ताभन्दा कम दिनेगरी बाँडफाँड भएमा सो संख्या बढ्न सक्नेछ। तर समान रुपमा बाँडफाँड हुँदा एक आवेदकले ३० कित्ताभन्दा बढी पाउने छैनन्।
माग गरिएको सेयर रकमको १० प्रतिशत रकम पहिले नै भुक्तानी गर्नुपर्ने व्यवस्थाअनुरुप दिएको रकमलाई सेयरको मूल्यले नभेटेमा सो रकम फिर्ता हुनेछ। क्यापिटलका अनुसार ६४ करोड ५५ लाख रुपैयाँ अग्रिम रुपमै उठेको छ।
प्रधानमन्त्री केपी शर्मा ओलीले समेत आवेदन दिएपछि सर्वसाधारणको यसमा आकर्षण बढेको हो। त्यस्तै सेयर परिसकेपछि सो रकमको वार्षिक ८ प्रतिशतका दरले बजारमा सूचीकृत नहुन्जेलसम्म व्याज समेत प्राप्त हुनेछ।
कम्पनीले नुवाकोट तथा रसुवा जिल्लाको सीमामा बग्ने नदीबाट माथिल्लो त्रिशुली ३ बी जलविद्युत आयोजना बनाउनेछ। सो आयोजनाको क्षमता ३७ मेगावाटको छ। व्याजबाहेक ७ अर्ब ४४ करोड लागत लाग्ने अनुमान छ।
निर्माण अवधिभरको व्याजसहित आयोजनाको लागत प्रतिमेगावाट २२ करोड २३ लाख लाग्ने अनुमान छ। यद्यपी सो लागतमा विदेशी बिनिमयदरले असर पार्न सक्ने छ।
आयोजनाको २८ प्रतिशत प्रगति भइसकेको कम्पनीले जनाएको छ।