हिमालयन बैंक र बैंक अफ काठमाण्डु (बिओके)ले मेलम्ची खानेपानी आयोजनाको काउन्टर ग्यारेन्टी वापतको भुक्तानी रकम पाउने भएका छन्। चीनको न्यायालयले मुद्दाको सुनुवाइ गर्दै रकम फिर्ता गर्न चाइना कन्स्ट्रक्सनलाई आदेश दिएको हो।
चाइना कन्स्ट्रक्सनले नै यसअघि ग्यारेन्टीवापतको रकम भुक्तानी गर्ने प्रतिवद्धता जनाउँदै अदालतमा भ्याकेट दर्ता गरेकाले रकम पाउने सुनिश्चितता भएको बैंक अफ काठमाण्डुका प्रमुख कार्यकारी अधिकृत शोभनदेव पन्तले जानकारी दिए।
‘हामीले सोसम्वन्धी मुद्दाको सुनुवाइको लागि कानुनी परामर्शदाताहरूको एउटा टोली चाइना पठाएका थियौं, तर कम्पनीले सो रकम तिर्ने प्रतिवद्धतासहित भ्याकेट गराएको कुरा जानकारीमा आएको छ’ पन्तले सेतोपाटीसँग भने।
बिओके र हिमालयनले मेलम्ची खानेपानी आयोजनाको तत्कालीन चिनिँया ठेकेदार चाइना रेल्वे १५ ब्युरो ग्रुपको चाइना कन्सट्रक्सन बैंकमार्फत् काउन्टर ग्यारेन्टी प्राप्त गरेका थिए। काउन्टर ग्यारेन्टीको सुरक्षणमा मेलम्ची खानेपानी आयोजनालाई रकम भुक्तानी भएको थियो। बिओकेले ६६ लाख २० हजार डलर बराबरको ग्यारेन्टी जारी गरेको थियो। हिमालय बैंकको ६१ करोड रुपैयाँ जारी गरेको थियो।
मेलम्ची र चिनियाँ ठेकेदार कम्पनीबीच करार सम्झौता भंग भएकाले उक्त ठेकेदार कम्पनीले हालेको रिट निवेदनको आधारमा चीनस्थित न्यायालयले चाइना कन्सट्रक्सन बैंकलाई काउन्टर ग्यारेन्टीको भुक्तानी दिनु नपर्ने आदेश जारी गरेको थियो।
अन्तर्राष्ट्रिय नियम र अभ्यास अनुसार चाइना कन्स्ट्रक्सन बैंकले बिओकेलाई जारी गरेको काउन्टर ग्यारेन्टी एउटा स्वतन्त्र र शर्तहीन दायित्व भएकाले अन्तर्राष्ट्रिय अभ्यासअनुसार फिर्ता पाउने अधिकार राख्दछ।
--1715160207.JPG)
