सेयर लगानीकर्ताले यसअघिका माग कार्यान्वयन नभएको भन्दै ९ दिने अल्टिमेटम दिएका छन्। अर्थमन्त्रालय, राष्ट्र बैंक, धितोपत्र बोर्ड तथा नेप्सेलाई माग पुरा गर्न आलटाल भएको भन्दै उनीहरुले ज्ञापनपत्र बुझाएका हुन्।
सेयर लगानीकर्ता दवाव समूहले माघ १५ गतेसम्म मागहरु कार्यान्वयन नभए कडा आन्दोलन गर्ने चेतावनी दिएको छ।
यसअघि पुँजी बजारको समस्या समाधानका लागि गठित कार्यदलले दिएको सुझावहरु कार्यान्वयन हुन नसकेको दवाव समूहको ठहर छ। तत्काल गर्नुपर्ने भनेर छुट्याइएका काम समेत हुन नसकेको समूहले जनाएको छ।
पूर्ण अनलाइन प्रणालीमा देखिएका समस्या हल गर्नुपर्ने, माघ १० गतेसम्म ब्रोकरमार्फत मार्जिन ट्रेडिङको काम गर्नुपर्ने, सेयर धितोमा आधार व्याजदरको बढीमा १ प्रतिशत व्याजमा ऋण दिनुपर्ने, कम्पनीको नेटवर्थभन्दा बढी रकममा आइपिओ तथा एफपिओ बिक्री गर्न नपाउने व्यवस्था गर्नुपर्ने माग लगानीकर्ताको छ।
आर्थिक वर्ष सकिएको ६ महिनाभित्रै साधारणसभा गराउनुपर्ने, अनलाइन सेयर कारोबार गर्दा ब्रोकर कार्यालयलाई २५ प्रतिशत अग्रिम रकम दिनुपर्ने व्यवस्था खारेज गर्नुपर्ने लगायत ३२ बुँदे माग उनीहरुले अघि सारेका छन्।
