सर्वोच्च अदालतले मुक्तिश्री सिमेन्टका नाममा आएको पैसा अजेय सुमार्गीले झिकेको भए पनि फेरि बैंकमै राख्न वा राख्न लगाउन आदेश दिएको छ।
यसअघि सर्वोच्चकै आदेशपछि उनले इन्भेष्टमेन्ट बैंकमा रहेको ७५ लाख अमेरिकी डलर झिकिसकेका छन्।
उक्त रकम फेरि पहिलेकै अवस्थामा ल्याउनु भन्ने पछिल्लो आदेश कार्यान्वयन जटिल भएको अधिवक्ता मेघराज पोखरेलले बताए। ‘पैसा फुकुवा गरिपाउँ भन्दै माग गरिएको रिटकै निवेदकविरूद्ध हुने गरि यस्तो आदेश गर्न मिल्दैनथ्यो। कि त अन्तरिम आदेश नहुने भन्न सक्थ्यो कि हुने मात्र भन्न सक्थ्यो,’ उनले सेतोपाटीसँग भने, ‘तर अदालतकै आदेशले झिकेको पैसा फेरि जम्मा गर भन्नु नमिल्दो आदेश हो।’
अदालतकै आदेश अनुसार सुमार्गीले पैसा झिकेकाले अब फेरि राख्दिनँ भन्न उनले पाउने कतिपयको तर्क छ।
कतिपयले भने सुमार्गीको पैसा फिर्ता ल्याउन राष्ट्र बैंकले नै पहल गर्नुपर्ने बताउँछन्। यसका लागि दुई तरिका रहेको उनीहरूको तर्क छ। पहिलो, इन्भेष्टमेन्ट बैंकले सुमार्गीलाई पत्र लेखेर झिकेको पैसा जम्मा गर्न भन्न सक्छ। तै पनि सुमार्गीले पैसा जम्मा गरेनन् भने अर्को उपाय पनि छ।
त्यो हो, राष्ट्र बैंकले सुमार्गीका अरू बैंक खाता रोक्का गर्न सक्ने। ‘पत्र पठाइसकेपछि पनि सुमार्गीले पैसा जम्मा गरेनन् भने पैसा जम्मा भए गर, नभए मैले तिम्रा अरू बैंक खाता रोक्का गर्छु भन्न सक्छ’, एक वकिलले भने।
सरकारी वकिलहरू भने सर्वोच्च अदालतको आदेशपछि उक्त रकम राष्ट्र बैंकले जम्मा गराउन लगाउन सक्ने बताउँछन्।
सुमार्गीले उक्त रकम जम्मा गरे पनि नगरे पनि राष्ट्र बैंकले उनको रकमको स्रोत खोज्न सक्ने उनीहरूको भनाई छ। ‘यो आदेशले त सुमार्गीको पैसाको स्रोत खोज वा उनीविरूद्ध सम्पत्ति शुद्धीकरणको अनुसन्धान गर्न सक्ने भन्छ। त्यसैले झिकेको रकम फेरि राखे पनि नराखे पनि उक्त पैसाको स्रोत खोज्न भने राष्ट्र बैंकले सक्छ। मुख्य विषय पनि यही हो,’ एक सरकारी वकिलले सेतोपाटीसँग भने।
उता राष्ट्र बैंक सर्वोच्चको पछिल्लो फैसलाले अल्मलिएको छ। राष्ट्र बैंकका उच्च अधिकारीहरु अहिले कुनै निर्णय नगरिसकेको भन्दै यस विषयमा बोल्न चाहेका छैनन्। डेपुटी गभर्नर चिन्तामणि सिवाकोटी आफूले पत्र नहेरेको बताउँदै यस सम्वन्धमा अहिले केही भन्न नसकिने जवाफ दिए।
‘पत्र हेरेपछि मात्रै के गर्ने हो भन्ने सम्वन्धमा राष्ट्र बैंकले निर्णय गर्ने हो’ उनले भने, ‘निर्णय नभएसम्म के हुन्छ भन्न मिल्दैन।’
पत्रमा भनिएअनुरुप इन्भेष्टमेन्ट बैंकलाई निर्देशन दिन सकिने उनले बताए।
उता नेपाल इन्भेष्टमेन्ट बैंक राष्ट्र बैंकको निर्देशन कुरेर बसेको छ। ‘बाहिर मिडियामा आएको भरमा हामीले निर्णय गर्ने होइन’, बैंकका प्रवक्ता दिपक श्रेष्ठले सेतोपाटीसँग भने, ‘निर्देशन आइसकेपछि त्यसैअनुरुप प्रक्रिया अघि बढ्ने हो।’
सुमार्गीले पैसा झिकेको भए पनि ‘फर्काउनू’ : सर्वोच्च