६ दिनदेखि नेप्सेमा अनसनरत सेयर लगानीकर्ताका माग पुरा गर्न सरकार सहमत भएको छ।
शुक्रबार लगानीकर्ताको दवाव समूह र अर्थमन्त्रालयबीच भएको वार्तामा अर्थमन्त्री डा. युवराज खतिवडाको राजीनामाको विषय बाहेक अन्य १२ बुँदाका मागमा सहमति जुटेको हो।
लगानीकर्ताले सहमतिको ड्राफ्ट पुँजी बजारको समस्या समाधानका लागि गठित समितिलाई बुझाएका छन्। डेपुटी गभर्नर शिवराज श्रेष्ठको संयोजकत्वमा गठित सो समितिले आइतबार अर्थ मन्त्रालयलाई प्रतिवेदन बुझाउँदै छ।
सो प्रतिवेदनमार्फत नै लगानीकर्ताका माग आइतबारदेखि नै सम्वोधन गर्ने सहमति भएको वार्ताका सदस्य लगानीकर्ता उत्तम अर्यालले जानकारी दिए।
आफ्ना माग पुरा नभए सोमबारदेखि सेयर लगानीकर्ताले आमरण अनसन थाल्ने भएका छन्। ‘आइतबारदेखि नै व्यवहारिक रुपमा मागहरु लागू भएको देखिनुपर्छ अन्यथा, झारा टार्ने काम भएमा सोमबारदेखि नै आमरण अनसन सुरु हुन्छ’ अनसनरत लगानीकर्ता गोपिकृष्ण थापाले भने।
आफूहरुको खबरदारी र विरोध मागहरु पूर्ण रुपमा लागू नहुन्जेलसम्म कायम रहने अर्यालले बताए। ‘सहमति हुँदैमा हाम्रो आन्दोलन रोकिँदैन, विगतमा सहमति हुने, लागू नहुने समस्या हुँदै आएको छ’ उनले सेतोपाटीसँग भने ‘यदी लागू नभएमा सोमबारदेखि नै आमरण अनसन सुरु हुन्छ।’ शनिबार र आइतबारको अनसन कार्यक्रम भने लगानीकर्ताले फिर्ता लिएका छन्।
बैंक खाता र डिम्याट खाता ईन्टिग्रेट भएको अनलाईन कारोबार प्रणालीको पहुँच तत्काल आम लगानीकर्तामा पुर्याउने विषयमा सहमति बनेको छ। यसो हुँदा सेयर भएकाले मात्रै सेयर बेच्न पाउने, बैंक ब्यालेन्स भएकाले मात्रै किन्न पाउने प्रणालीको विकास हुनेछ।
त्यस्तै धितोपत्र बोर्डले तीन बर्ष अघिदेखि गैर आवासीय नेपाली र विदेशमा बस्ने नेपालीलाई पूँजी बजारमा ल्याउन कार्यविधि बन्दै गरेको भन्दै आएकोमा तत्काल सो कार्यविधि लागू गर्ने सहमति भएको छ।
शेयर दलाल मार्फत मार्जिन ट्रेडिङ थाल्ने, शेयर धितो कर्जाको सिमा बढाउने सहमति भएको छ। नागरिक लगानी कोषलाई मार्केट डिलरको रुपमा विकास गर्नका लागि प्रक्रिया अघि बढाउने सहमति भएको छ।
न्यून स्तरको रेटिङ पाएका कम्पनीहरुलाई आईपीओ बिक्री गर्न तत्काल बन्देज लगाउने, जलबिद्युत र अन्य कम्पनीहरुलाई प्रत्यक्ष नियमनकारी निकायको ब्यवस्था गर्ने, बैंकहरुलाई ब्रोकर लाइसेन्सका लागि अनुमति दिने लगायतका विषयमा सहमति भएको लगानीकर्ता थापाले बताए।
