अनलाइन सेयर कारोबार सुरु भएको १ महिना बितेपछि लगानीकर्ता आफैले कारोबार गर्ने मौका पाएका छन्।
यसअघिसम्म ब्रोकर कार्यालयमा गई उनीहरुलाई आदेश सिस्टममा प्रविष्ट गराउन भन्नुपर्ने बाध्यता रहँदै आएकोमा लगानीकर्ता आफैले घरबाटै इन्टरनेटको प्रयोगबाट आदेश पोष्ट गर्ने मौका पाएका छन्।
कात्तिक २० गतेबाट अनलाइन सेयर कारोबार सुरु भए पनि बीचबीचमा देखिएका प्राविधिक समस्याका कारण आजदेखि लगानीकर्तालाई यूजरनेम र पासवर्ड प्रदान गर्न थालिएको हो।
पहिलो दिन ८ जना लगानीकर्ताको यूजर नेम र पासवर्ड एक्टिभ भएको नेप्सेले जनाएको छ। ‘धेरै रिक्वेस्ट नआएका कारण ८ जनाको मात्रै युजरनेम र पासवर्ड एक्टिभ भएको छ’ प्रवक्ता मुराहरि पराजुलीले भने।
लगानीकर्ता आफैले ब्रोकर कार्यालयसँग सम्झौता गरी अनलाइन कारोबारका लागि युजर नेम र पासवर्डको आग्रह गर्नुपर्छ ।
ब्रोकरले लगानीकर्ताको आदेशअनुसार एक्टिभ गर्नका लागि नेप्सेमा सूचना पठाउँछ। सोअनुसार नेप्सेले एक्टिभ गरेपछि लगानीकर्ता आफै कारोबार गर्न सक्षम हुनेछन्।
कसरी गर्ने अनलाइनबाट कारोबार ?
अनलाइनबाट सेयर कारोबार गर्नका लागि लगानीकर्ताले ब्रोकरकहा गई सबैभन्दा पहिले ‘केवाइसी अपडेट’ गराउनुपर्नेछ। केवाइसी अपडेट नभएसम्म लगानीकर्ता अनलाइन कारोबारमा जोडिन पाउने छैनन्। जसमा अनलाइन खाता रोजेकाले अनलाइनबाट आवेदन दिन सक्नेछन्। त्यस्तै ब्रोकर कार्यालयसँग एक सम्झौता पत्रमा हस्ताक्षर गर्नुपर्नेछ।
त्यसपछि ब्रोकर कम्पनीले केवाइसी रुजु गरी टिएमएस (ट्रेड म्यानेजमेन्ट सिस्टम)मा समाविष्ट गर्नेछन् भने लगानीकर्ताले ब्रोकर कम्पनीबाट ‘ट्रेडिङ यूआरएल एड्रेस’ प्राप्त गर्छन्।
उक्त यूआरएल खोलेर ‘फरगेट पासवर्ड’मा क्लिक गर्नुपर्नेछ र उक्त विन्डोमा आफ्नो युजरनेम र इमेल प्रविष्ट गर्नुपर्नेछ। त्यसपछि इमेलमा पासवर्ड परिवर्तन गर्ने लिंक उपलव्ध हुनेछ। इमेलमा प्राप्त लिंकमा गई पासवर्ड परिवर्तन गर्नुपर्नेछ।
अब ट्रेडिङ यूआरएलमा गई आफ्नो यूजरनेम र पासवर्ड प्रयोग गरी टिएमएस ‘समिट’ गरी सिस्टम लगिन गर्न सकिन्छ। लगीनका क्रममा ओटिपी (वन टाइम पासवर्ड) लगानीकर्ताले इमेलमा प्राप्त गर्न सक्नेछन्। सो ‘ओटिपी’ स्कृनमा राखी लगिन गर्नुपर्नेछ।
अर्डर पोष्ट गर्नका लागि बायाँ साइडमा रहेको अर्डर म्यानेजमेन्टमा गई नर्मल अर्डरमा क्लिक गर्नुहोस्। त्यसपछि अर्डर इन्ट्रीको स्कृन खुल्नेछ। सेयर खरिद गर्नेले ‘बाइ’ बेच्नेले ‘सेल’ छान्नुहोस्।
सेयरको प्रकारमा ‘इक्वीटी’ छान्नुहोस्। अब कम्पनी छनौट गर्नुहोस् र उक्त कम्पनीको प्रविष्टित आदेशहरु हेर्न सकिन्छ। त्यही आदेश पेजमा सेयर संख्या र चाहेको मूल्य राख्नुहोस् र ‘प्लेस अर्डर’ क्लिक गर्नुहोस्। सो क्लिकपछि यदी ‘एमई नट लग’ भन्ने सन्देश आएमा ब्रोकरलाई नै सम्पर्क गर्नुहोस् र आफ्नो डिएनए लगिन गर्न भन्नुहोस्।
अन्यथा अर्डर प्लेस भएको सन्देश स्कृनमा आउनेछ। अर्डर दिइसकेपछि आफैले त्यही स्कृनमा हेर्न सकिनेछ। अर्डर म्याच भएमा कारोबार सम्पन्न हुनेछ भन्ने अन्यथा त्यो दिनको अन्त्यमा रद्द हुनेछ।
बीचमा अर्डर परिवर्तन वा रद्द गर्न अर्डर म्यानेजमेन्टमा गई अर्डर बुकमा जानुहोस् र ओपन अर्डरमा क्लिक गर्नुहोस्। आफ्नो अर्डरको ‘मोडिफाइ’ संकेतमा क्लिक गरी किनबेच गर्न चाहेको संख्या वा मूल्य परिवर्तन गरी प्लेस अर्डरमा क्लिक गर्नुहोस् वा रद्द गर्न चाहेको खण्डमा क्यान्सिल संकेतमा क्लिक गरी रद्द गर्नुहोस्।
