मेगा बैंकले मर्चेन्ट बैंकिङ संचालन गर्ने भएको छ। बैंकले २० करोड चुक्ता पुँजी रहनेगरी ‘मेगा सेयर क्यापिटल’ नामक सहायक कम्पनी संचालनमा ल्याउन लागेको हो।
आठौं वार्षिकोत्सवको अवसरमा राजधानीमा आयोजित एक कार्यक्रममा अध्यक्ष भोजबहादुर शाहले मर्चेन्ट बैंकिङ संचालन गर्नेगरी काम अघि बढेको जानकारी दिए।
अब बैंकको रफ्तार झनै द्रुत गतिमा अघि बढ्ने शाहले दावी गरे। ‘टुरिजम र पश्चिमाञ्चल डेभलपमेन्ट बैंक गाभिएपछि मेगा बैंकमा झनै उत्साह थपिएको छ, अब बैंकको रफ्तार झनै बढ्नेछ’ उनले भने।
चुक्ता पुँजी, व्यावसायको आकार, कर्मचारी संख्या र नेटवर्कका हिसाबले बैंक अगाडि रहेको बताउँदै उनले आगामी आर्थिक वर्षदेखि बैंकको मुनाफामा निकै बृद्धि हुने दावी गरे।
अध्यक्ष शाहले आगामी चार बर्षभित्र बैंकको आफ्नै कर्पोरेट भवन बनाउने जानकारी दिए। संघीय संचरना अनुसार हरेक प्रदेशमा ‘प्रदेश हेडक्वार्टर’ स्थापना गरी मेगा बैंकको सञ्जाललाई व्यापक बनाइने उनको भनाइ छ। विज्ञहरुसँगको परामर्शमा पाँच बर्षीय रणनीतिक योजना बनाएर कार्यान्वयनमा ल्याइसकेको बताउँदै उनले कृषि, पर्यटन र जलविद्युतको क्षेत्रमा व्यवसाय केन्द्रित गर्ने बताए।
बैंककी प्रमुख कार्यकारी अधिकृत अनुपमा खुञ्जेलीले नेपालको बैंकिङ क्षेत्रमा उत्कृष्ट ब्राण्डका रुपमा मेगा स्थापित भएको दावी गरिन्। खुञ्जेलीले भनिन् ‘ग्राहकहरुको चाहना अनुसार लोकप्रिय र नवीनतम सुविधाहरु हाम्रो प्राथमिकतामा छन्, आगामी दिनमा झनै आकर्षक सुविधाहरु ल्याउने छौँ।’
बार्षिकोत्सवको अवसरमा सिइओ खुञ्जेलीले तीन वटा आकर्षक कर्जा योजनाहरु पनि सार्वजनिक गरिन्। साना तथा मझौला व्यावसायको प्रबर्धनका लागि ‘मेगा साना तथा मझौला कर्जा’, आवास तथा गाडी लिन चाहने मध्यमवर्गीय नेपालीका लागि ‘मेगा घर तथा गाडी कर्जा’ र विभिन्न पेशा व्यावसायमा संलग्नहरुलाई बिनाधितो ऋण प्रदान गर्ने गरी ‘मेगा प्रोफेशनल लोन’ योजना सार्वजनिक गरिएको छ। यी तीन वटै कर्जा योजनाहरु ग्राहकले मेगा बैंकको जुनसुकै शाखाबाट प्रक्रिया सुरु गरेको २४ घण्टाभित्रै निर्णय गरिने र ७ दिनभित्र कर्जा प्रवाह गरिने सिइओ खुञ्जेलीले बताइन्।