अब सबै लगानीकर्ता अनलाइन कारोबारमा जोडिन पाउने भएका छन्।
यसअघि सीमित ब्रोकर कम्पनीहरु मात्रै ‘ट्रेड म्यानेजमेन्ट सिस्टम’मा आबद्ध रहेकोमा आइतबारदेखि ५० वटै ब्रोकर कम्पनी यसमा जोडिएकाले सबै लगानीकर्ता अनलाइन कारोबारमा जोडिन पाउने भएका हुन्।
नेपाल स्टक एक्स्चेन्जका अनुसार अब सम्पूर्ण लगानीकर्ताले आ–आफ्ना ब्रोकर कम्पनीमार्फत युजर नेम र पासवर्ड लिन पाउने छन्।
त्यही युजर नेम र पासवर्डका आधारमा लगानीकर्ता नेप्से अनलाइन ट्रेडिङ सिस्टम (एनओटिएस)सँग जोडिन सक्ने एक्स्चेन्जले जनाएको छ। साथै उसले सबै लगानीकर्तालाई यसमा आवद्ध भई कारोबार हेर्न आग्रह गरेको छ।
युजर नेम र पासवर्ड लिएपछि लगानीकर्ताले ब्रोकर कम्पनीहरुले हालको कम्प्युटराइज्ड ट्रेडिङ सिस्टममा पोष्ट गरेको र म्याच भएको आदेश हेर्न सक्ने छन्।
हाल परीक्षण कारोबारमा अनलाइन प्रणाली रहेकाले उनीहरुले आदेशको विवरणहरु हेर्न मात्रै पाउने छन्। विवरणहरु हेरेपछि ब्रोकर तथा लगानीकर्ताका राय सुझावका आधारमा सिस्टममा थप विषयबस्तु समेटिन सकिने नेप्सेले स्पष्ट पारेको छ।
नेप्सेका अनुसार औपचारिक रुपमा प्रयोगकर्ताको स्वीकारोक्ति (यूएटी) गर्न नयाँ कम्पनी छनौट भइसकेको छ। सो कम्पनीले यसअघि बोलपत्रमा उल्लेख गरिएका शर्त तथा सेवाहरु नयाँ प्रणालीमा भए नभएको परीक्षण तथा चेकजाँच गर्नेछ।
चेकजाँचपछि उसैले आइएसओ मान्यता प्रदान गर्दै प्रयोग गर्नका लागि योग्य छ भनी निश्चित गरेपछि मात्रै अनलाइन ट्रेडिङ पूर्ण रुपमा कार्यान्वयनमा आउने छ।
अनलाइन ट्रेडिङ सिस्टमको परीक्षण सफल भइसकेपछि लगानीकर्ताले युजर नेम र पासवर्डका आधारमा घरबाटै आदेशहरु पोष्ट गर्न सक्नेछन्। खरिद वा बिक्री गर्न चाहेको कम्पनी, सेयरको संख्या, चाहेको मूल्य भरेर लगानीकर्ता आफैले आदेश पोष्ट गर्न सक्नेछन्।
साथै आफ्नो आदेश विपरित व्यक्ति वा संस्थाको आदेशसँग म्याच भई सम्पन्न भएको कारोबार पनि हेर्न सक्नेछन्। यसले कारोबारका लागि ब्रोकर कम्पनी धाउनुपर्ने अहिलेको बाध्यात्मक अवस्था अन्त्य हुनेछ। यद्यपी ब्रोकर कम्पनी, निक्षेप सदस्य लगायतलाई बुझाउनुपर्ने कमिसन भने यथावत रहनेछ।