बैंक तथा वित्तीय संस्थाहरुमा नयाँ आर्थिक वर्षमा ४८ अर्ब रुपैयाँ लगानीयोग्य रकम थपिने भएको छ।
लगानीयोग्य रकमको अभाव झेलिरहेका बैंकहरुलाई यसले राहत पुग्ने राष्ट्र बैंकले जनाएको छ। आगामी आर्थिक वर्षको मौद्रिक नीति सार्वजनिक गर्दैै राष्ट्र बैंकले केही अनुपातहरु हेरफेर गरेको छ। जसले गर्दा बैंकहरुमा सो रकम थपिने भएको हो।
वाणिज्य बैंक र विकास बैंकहरुले कायम गर्नुपर्ने अनिवार्य नगद मौज्दात अनुपात (सिआरआर) घटाइएको छ। यसअघि वाणिज्य बैंकहरुले यस्तो अनुपात ६ प्रतिशत र विकास बैंकले ४ प्रतिशत कायम गर्नुपर्ने प्रावधान रहेकोमा अब दुवैले ४ प्रतिशत मात्रै कायम गरे पुग्नेछ। त्यस्तै फाइनान्स कम्पनीहरुले ४ प्रतिशत नै यस्तो अनुपात कायम गर्नुपर्ने भएकोमा सो अनुपात कायमै राखिएको छ।
यसबाट बैंक तथा वित्तीय संस्थाहरुमा थप ४८ अर्ब रुपैयाँ लगानीयोग्य रकम थपिने गभर्नर डा. चिरञ्जिवि नेपालले जानकारी दिए। हाल वाणिज्य बैंकहरुमा निक्षेपको मात्रा सोचेअनुसार बढ्न नसक्दा लगानीयोग्य रकममा चाप परेको बताउँदै उनले सिआरआर घटाउँदा सहजता आउने विश्वास व्यक्त गरे।
त्यस्तै बैधानिक तरलता अनुपात वाणिज्य बैंकहरुका लागि १२ प्रतिशतबाट घटाएर १० प्रतिशत, विकास बैंकका लागि ९ बाट ८ तथा फाइनान्सका लागि ८ बाट ७ प्रतिशत कायम गरिएको छ।
राष्ट्र बैंकले घोषणा गरेको यो व्यवस्थाले लगानीयोग्य रकमलाई थप सहजता प्रदान गर्ने बैंकर्स अनिलकेशरी शाहले विश्वास व्यक्त गरे।
मौद्रिक नीति सार्वजनिकपछि संचारकर्मीसँग कुराकानी गर्दै शाहले लगानीयोग्य रकम थपिँदा व्याजदर पनि बढ्न नपाउने बताए। ‘मौद्रिक नीतिलाई समग्रमा सकारात्मक रुपमा लिएका छौँ’ उनले भने ‘सिआरआर घटाइँदा बैंकहरुमा केही लगानीयोग्य रकम जुट्नेछ।’
वाणिज्य बैंकहरुले असार १५ सम्म २३ खर्ब ७७ अर्ब निक्षेप संकलन गरी २० खर्ब ८० अर्ब कर्जा प्रवाह गरेका छन्।