कुलिङ पिरियडको अवधि सकिएपछि अनिलकेशरी शाह नविल बैंकको प्रमुख कार्यकारी अधिकृत (सिइओ) पदमा नियुक्त भएका छन्। उनी यसअघि नविल बैंकको डेपुटी सिइओका रुपमा रही पदभार सम्हाल्दै आएका थिए।
नविलले गत पुसमा उनलाई सिइओका रुपमा नियुक्त गरेकै दिन राष्ट्र बैंकले ६ महिने कुलिङ पिरियडको व्यवस्था ल्याएपछि उनको नियुक्ती खारेज भएको थियो।
मेगा बैंकमा सिइओ भई छाडेको ६ महिना नपुगेपछि सिइओका रुपमा शाहको नियुक्ती खारेज भएको थियो। पछि नविलले पुनः उनलाई नै डेपुटी सिइओका रुपमा जिम्मेवारी दिएको थियो।
बिहीबार बसेको संचालक समितिको बैठकले डेपुटीका रुपमा रहेका शाहलाई सिइओमा नियुक्त गरेको हो।
साना व्यवसायीलाई समेटेर अघि बढ्छौँः शाह
सिइओमा नियुक्त शाहले साना तथा मध्यम व्यवसायी तथा उद्यमीलाई समटेर नविल बैंक अघि बढ्ने प्रतिबद्धता जनाएका छन्। दुर्गम क्षेत्रमा सेवालाई विस्तार गर्दै लैजाने र आर्थिक रुपमा पछाडि परेका समुदायको जीवनस्तर उकास्न बैंकले सघाउ पुर्याउने उनले बताए।
पछि परेको प्रदेश नं. ७ मा नविलका शाखा १२ वटा रहेको बताउँदै उनले ति शाखाहरुमार्फत त्यहाँका सर्वसाधारणलाई बैंकिङ पहुँचमा ल्याउने प्रतिबद्धता जनाए।
नविल बैंकको ब्राण्ड बनिसकेको उल्लेख गर्दै उनले भने ‘नविल पहिले नै स्थापित ब्राण्ड हो, यसलाई रि–इमेजिन गर्नेतिर हामी फोकस हुनेछौँ।’
नविलमा ३०/४० वर्षसम्म काम गरेका अनुभवी र नयाँ जोश जाँगर भएका युवाहरु समेत भएकाले संयुक्त रुपमा टिमलाई अघि बढाउने प्रतिबद्धता उनले जनाए।