संयुक्त अरब इमिरेट्स (युएई) राइड सेयरिङ कम्पनी याङ्गो नेपाली बजारमा भित्रिएको छ।
नेपाली राइड सेयरिङ प्लेटफर्म ट्याक्सीमाण्डूले याङ्गो एप भित्र्याएको हो।
ट्याक्सीमाण्डु र अन्तर्राष्ट्रिय राइड सेरिङ एप याङ्गोबीच सहकार्य भएसँगै याङ्गो एप अब नेपाली प्रयोगकर्ताले पनि सहज रूपमा उपयोग गर्न सक्ने छन्।
याङ्गो हाल विश्वका ३० भन्दा बढी मुलुकहरूमा सञ्चालनमा छ। अब नेपालमा ट्याक्सीमाण्डूको आधिकारिक स्थानीय साझेदारको रूपमा प्रवेश गरेको हो।
यात्रु र चालकलाई अन्तर्राष्ट्रियस्तरको प्रविधि र अनुभव दिन याङ्गो एप नेपालमा ल्याएको ट्याक्सीमाण्डूका प्रबन्ध निर्देशक अर्जुन केसीले जानकारी दिए।
'डिजिटल लेखा प्रणाली, रियल टाइम ट्र्याकिङ, र फ्लिट व्यवस्थापनजस्ता फिचरले राइड सेयरिङ सेवामा थप पारदर्शिता बढाउँछ,' उनले भने।
प्रविधिमैत्री, पारदर्शी र सस्तो सेवाले यो सहकार्य देशभरका यात्रुका लागि गेम चेन्जर बन्ने उनको विश्वास छ।
अर्जुन केसीका अनुसार अब ट्याक्सी चालक र बाइक राइडर हरूले घरमै बसेर कोड स्क्यान गरी सहज रूपमा दर्ता गर्न सक्ने सुविधा सुरू गरिएको छ।
मंगलबारदेखि सफ्ट लन्च गरिएको याङ्गो एपमार्फत बाइक राइड न्यूनतम ४० रूपैयाँ र ट्याक्सी राइड १८० रूपैयाँबाट सुरू हुनेछ।
सुरूका दिनमा चालक र यात्रु दुवैका लागि बोनस योजना पनि लागु गरिएको छ।
त्यसैगरी, आगामी तीन वर्षसम्म तीन प्रतिशतभन्दा बढी कमिसन नलिने घोषणा कम्पनीले गरेको छ। जसले चालकहरूको आम्दानीमा वृद्धिमा सहयोग पुग्नेछ।
याङ्गोले आफ्नै सवारी नभई स्थानीय चालक र ट्याक्सी व्यवसायीलाई प्रविधिमार्फत यात्रुसँग जोड्ने छ।
याङ्गोका प्रमुख व्यापार अधिकृत अदेनियी अदेबायो भन्छन्, 'स्थानीय उद्यमीसँगको सहकार्यले आर्थिक अवसरहरू सिर्जना गर्नेछ र सहरको स्मार्ट मोबिलिटी पूर्वाधारमा योगदान पुग्नेछ।'
यात्रु र चालक दुवैको सुरक्षा सुनिश्चित गर्न याङ्गो एपमा २० भन्दा बढी सुरक्षा फिचरहरू समावेश गरिएको छ।
एपमार्फत यात्राको गन्तव्य अनुसार स्वचालित रूपमा अनुमानित भाडा देखिनेछ र हाललाई नगद भुक्तानीको व्यवस्था गरिएको छ। निकट भविष्यमा अनलाइन भुक्तानी प्रणाली पनि थपिनेछ।
याङ्गो एक विश्वव्यापी प्रविधि कम्पनी हो। जसले अफ्रिका, ल्याटिन अमेरिका, युरोप, दक्षिण एसिया लगायतका क्षेत्रमा राइड, डेलिभरी, फुडटेक, तथा डिजिटल सेवा प्रदान गर्दै आएको छ।
