टिमुरखेती विस्तारका लागि  कृषकलाई बिरुवा वितरण


बेनी नगरपालिका–९ तोरीपानीका कृषकलाई टिमुरखेती विस्तारका लागि बिरुवा वितरण गरिएको छ । व्यापार तथा निकासी प्रवर्द्धन केन्द्रको सहयोगमा म्याग्दी उद्योग वाणिज्य सङ्घले तोरीपानीको भुमेसिद्ध टिमुर सञ्जालमा आबद्ध १५० कृषकलाई चार हजार बिरुवा वितरण गरेको हो ।

टिमुरको उत्पादन वृद्धि गरी अन्तरराष्ट्रिय बजारमा निकासी गर्ने उद्देश्यले खेती विस्तारमा सघाउन बिरुवा वितरण गरेको सङ्घका कार्यबाहक अध्यक्ष उत्तमकुमार कर्माचार्यले बताए । सङ्घले ‘एक गाउँ, एक उत्पादन’ कार्यक्रमअन्तरगत पछिल्लो पाँच वर्षयता तोरीपानी, नारच्याङ र दग्नामका कृषकलाई १९ हजार ५०० बिरुवा वितरण भएको थियो ।

व्यापार तथा निकासी प्रवर्द्धन केन्द्रका उपनिर्देशक सिद्धचरण दाहालले तेस्रो मुलुकमा निकासी गरी विदेशी मुद्रा आर्जनका लागि टिमुरको प्रशस्त सम्भावना देखिएकाले खेती विस्तारमा जोड दिन कृषकलाई आग्रह गरे । सो कार्यक्रममा तोरीपानीका कृषकलाई टिमुरखेती प्रविधिका बारेमा सहायक वन अधिकृत चन्द्रमणि सापकोटाले तालीम  दिएका थिए । कृषक सागर बानियाँले टिमुरको बिरुवा र फलको माग उच्च रहेकाले बजारको समस्या नरहेको बताए । उनका अनुसार गत वर्ष तोरीपानीबाट एक हजार ४०० केजी टिमुर निकासी भएको छ ।

कृषकले टिमुरको बिरुवाको मूल्य बढाउनुपर्ने र निकासीका लागि अनुमति प्रक्रिया सहज बनाउन आग्रह गरेका थिए । जिल्ला कृषि विकास कार्यालयका, कृषि प्रसार अधिकृत बेदनाथ पन्थीले बाँझो जमिनलाई उपयोगमा ल्याउन टिमुरखेती उपयुक्त भएको बताए ।

अचार र दालमा मसलाका रुपमा प्रयोग हुने, मुखमा राख्दा रमरम गर्ने स्वाद पाइने टिमुर सुगन्धित तेल र औषधि बनाउनसमेत प्रयोग हुन्छ । जोमसोम, पोखरा, चितवन, काठमाडौँको तारे होटलका साथै अष्ट्रेलिया, अमेरिका र जर्मनीमा टिमुर निकासी हुने गरेको छ । रासस

Share:

© 2017 Setopati Sanchar Pvt. Ltd.