तनहुँमा यस वर्ष २५ करोड रुपैयाँ बराबरको सुन्तला उत्पादन हुने अनुमान गरिएको छ। सुन्तला खेतीका लागि यस वर्ष मौसम अनुकूल भएको र उत्पादन क्षेत्र बढेकाले सुन्तला उत्पादनमा वृद्धि आउने अनुमान गरिएको हो ।
कृषि ज्ञान केन्द्र तनहुँका सूचना अधिकारी ज्योति क्षेत्रीले गत वर्ष तनहुँबाट १८ करोड रुपैयाँको सुन्तला उत्पादन भएकामा यस वर्ष २५ करोड रुपैयाँ बराबरको सुन्तला उत्पादन हुने प्रक्षेपण गरिएको जानकारी दिए।
अघिल्लो वर्ष छ हजार ५२६ मेट्रिकटन सुन्तला उत्पादन भएकामा यस वर्ष छ हजार ९३८ मेट्रिकटन सुन्तला उत्पादन हुने अनुमान गरिएको छ। तनहुँमा यस वर्ष एक हजार २८ हेक्टर क्षेत्रफलमा सुन्तला खेती गरिएको छ । तनहुँमा उत्पादित सुन्तला पोखरा, काठमाडौँ, चितवनलगायतका ठाउँमा निर्यात हुँदै आएको छ ।
तनहुँको राइपुर, वैदी, छिपछिपे, तनहुँसुर, बेनीकोट, बन्दीपुर, घाँसीकुवा, नाम्सीकोट, भानुमतिलगायत सुन्तला खेतीको पकेट क्षेत्र हुन् । तनहुँको म्याग्दे गाउँपालिका–२ का विश्वबहादुर अधिकारी र निर्मल अधिकारीले यस वर्ष सुन्तला बेचेर ५५ लाख रुपैयाँ आम्दनी गर्नुभएको छ । संयुक्त रूपमा सुन्तला खेती गर्दैै आएका उनीहरुले यस वर्ष जिल्लामै सबैभन्दा बढी सुन्तला बिक्री गरेका हुन।
सोही ठाउँका शुकनारायण श्रेष्ठले पनि यस वर्ष ३१ लाखको सुन्तला बिक्री गरेका हुन। भीमाद नगरपालिका–९ का अध्यक्ष इमानसिंह थापाले भानुमतिबाट यस वर्ष दुई करोड रुपैयाँ बराबरको सुन्तला उत्पादन हुने अनुमान गरिएको जानकारी दिए।
व्यास नगरपालिका–११ तनहुँसुरमा ५० देखि ६० लाख रुपैयाँ सम्मको सुन्तला उत्पादन हुने अनुमान गरिएको कृषि शाखाका प्राविधिक विश्वराज वाग्लेले बताए। उनका अनुसार व्यास नगरपालिका–१३ वेनीकोटबाट समेत एक करोड ५० लाख रुपैयाँको सुन्तला उत्पादन हुने लक्ष्य छ ।
देवघाट गाउँपालिकामा भने यस वर्ष सुन्तला उत्पादनमा कमी आउने अनुमान गरिएको छ । गाउँपालिकाका कृषि शाखाका प्राविधिक आनन्दराज घिमिरेले असिना र खडेरीको कारण सुन्तला उत्पादन कमी हुनसक्ने बताए। उनका अनुसार गत वर्ष गाउँपालिकाबाट दुई करोड रुपैयाँ भन्दा बढीको सुन्तला उत्पादन भएको थियो ।
