कालीमाटी फलफूल तथा तरकारी बजार विकास समितिले बजारमा रहेका ५७ वटा स्टलसँग भएको सम्झौता खारेज गरेको छ। यसअघिको अनुगमनको क्रममा रातो सूचीमा परेको व्यवसायीले चित्तबुझ्दो जवाफ नदिएपछि आज ५१ वटा स्टल खारेज गरिएको हो।
यसअघि ६ वटा स्टल खारेज गरिएको थियो।
बजारमा ंमा रहेको सिण्डिकेट तथा बिचौलियाको प्रभाव हटाउन कालीमाटी बजारको अनुगमन गरी नियम विपरीत सञ्चालन गर्ने ९८ व्यवसायीमाथि कारवाही गरिएको जानकारी दिँदै कृषि मन्त्री चक्रपानी खनालले १३१ व्यवसायीलाई सचेत गराइएको र २०८ व्यवसायीलाई सम्झौताको पूर्ण परिपालन गर्न निर्देशन दिइएको बताए।
बजारमा गुणस्तरीय र स्वच्छ दूध उपभोग गर्न पाउने अवस्थालाई मध्यनजर गर्दै उपत्यकाका विभिन्न दुग्ध उद्योगको अनुगमन कार्यलाई तीव्रता दिइएको मन्त्रालयले जनाएको छ । २५ वटा दुग्ध उद्योगको अनुगमन र परीक्षणबाट प्राप्त नतिजाका आधारमा न्यूनतम् मापदण्डभन्दा कम गुणस्तरको दूध प्रशोधन तथा बिक्री वितरण गर्ने उद्योगलाई कारवाहीको दायरमा ल्याइएको छ । मन्त्रालयले दूध तथा दुग्धजन्य पदार्थको गुणस्तर सुधारका लागि ‘स्वच्छ तथा गुणस्तरीय दूध तथा दुग्ध पदार्थ उत्पादन निर्देशिका–२०७५’ तयार गरेको छ ।
