कृषकलाई पशुपालन व्यवसायमा हौसला बढाउन पाल्पाको डुम्रे दुग्ध उत्पादक सहकारी संस्थाले निःशुल्क दूध ढुवानी गर्न थालेकाले गाइपालनमा कृषकको आकर्षण बढ्न थालेको छ।
सहकारीले कृषकको घरघरमा पुगेर दूध खरीद गर्दै आएको छ। घरघरमा दूध खरीदका लागि सहकारी पुगेपछि डुम्रे क्षेत्रका कृषक उत्साहित हुँदै विभिन्न पेशा, व्यवसाय, रोजगार छाडेर गाईपालनमा लागेका हुन्। कृषकको आम्दानी उकास्न र उनीहरूलाई दूध उत्पादनबाट आत्मनिर्भर बनाउने उद्देश्यले कृषकको घरदैलोमै पुगेर निःशुल्क ढुवानी खर्चमा दूध खरीद गर्दै आइरहेको सहकारीका व्यवस्थापक गोपाल जिसीले बताए।
‘कृषकले दूध उत्पादन गरे मात्र भयो, गोठदेखि बजारसम्म दूध विक्री गर्ने जिम्मा सहकारीले लिएको छ,’ उनले भने। सहकारीमा हाल दैनिक तीन हजार लिटर जति डुम्रे आसपास क्षेत्रबाट दूध संकलन हुने गरेको जिसीको भनाइ छ। यस सहकारी संस्थामा तीसवटा व्यावसायिक पशुफार्म दर्ता भएका छन्। सहकारीले घरमै आएर दूध खरीद गर्न थालेपछि व्यवसाय गर्न सजिलो भएको माथागढी गाउँपालिका–२ रुप्सेका अगुवा कृषक कृष्णप्रसाद भट्टराईले जानकारी दिए। दूध विक्री गरेर छोराछोरीलाई उच्च शिक्षा दिन, घरायसी खर्च चलाउन सजिलो भएको उनको भनाइ छ। भट्टराईको फार्ममा हाल दशवटा उन्नत जातका गाईबाट दैनिकजसो ८० लिटर जति दूध विक्री हुन्छ। एक महिनामा दूध विक्रीबाट एक लाख रुपैयाँको हाराहारीमा आम्दानी लिँदै आएको भट्टराईले बताए।
त्यस्तै, तानसेन नगरपालिका–९ दमकडा बस्ने सुमा बन्जाडेले पनि छिमेकीले घरबाटै दूध विक्री गरेको देखेपछि गाईपालन व्यवसाय सुरू गरेका छन्। रोजगारीको सिलसिलामा ६ वर्षसम्म विदेशमा पसिना बगाएकी बन्जाडेले दशवटा गाईको दूध विक्रीबाट एक महिनामा ४० हजार रुपैयाँसम्म आम्दानी गरेको जानकारी दिँदै उनले भने, ‘विदेशबाट घर आए, गाउँमा सबै छिमेकी गाईपालनमा लागेको देखेर दूध खरीद गर्न सहकारीले बिना ढुवानी खर्च घरघरमा पुगेको देखेपछि मैले पनि गाई पाल्न सुरू गरेको हुँ।’
दूध बेच्नकै लागि बजारसम्म जानु नपर्ने, घरबाटै बेच्न पाइने भएपछि कृषकलाई धेरै सजिलो भएको उनको अनुभव छ। दूध विक्रीका लागि सहज वातवरण बनेपछि डुम्रे क्षेत्रका स्थानीयवासीको आम्दानीको स्रोत नै गाईपालन व्यवसाय बनेको हो।
रासस
