सदरमुकाम तानसेनदेखि करीब १४ किलोमिटरको दूरीमा रहेको कृषि होमस्टेले एक वर्षमा ३८ लाख रुपैयाँ बराबरको आम्दानी गर्न सफल भएको छ ।
खस्यौलीको हिरापोखरामा सिर्जना फार्म प्रालिद्वारा सञ्चालित कृषि होमस्टेले गएको वर्ष सो आम्दानी गर्न सफल भएको हो । यहाँ पछिल्लो समय बाह्य तथा आन्तरिक पर्यटक भित्रन थालेपछि आम्दानी पनि बढ्दै गएको हो ।
सो होमस्टेमा एक वर्षमा आन्तरिक र बाह्य गरी एक हजार ५०० देखि एक हजार ७०० सम्म पर्यटक भित्रने गरेको व्यवस्थापक जनक चौधरी बताउँछन्। गाउँमा उत्पादित कृषिजन्य वस्तुको परिकारको स्वादमा रमाउन यहाँ पर्यटक आउने गरेका छन् । उक्त होमस्टेमा अन्यत्र भन्दा गाउँघरमै उत्पादित कृषिजन्य वस्तुको उत्पादन मात्र पाइने हुँदा पर्यटकको आकर्षण र रोजाइ बनेको हो ।
एक दिन र एक रातका लागि यहाँ नेपाली नागरिकलाई दुई हजार २ सय रुपैयाँ र विदेशी नागरिकलाई तीन हजार ३ सय रुपैयाँ शुल्क कायम गरिएको छ । छत्तीस जना युवा मिलेर ३५० रोपनी जग्गा खरीद गरी व्यवसाय सञ्चालन गरेका हुन् । विगत पाँच वर्षदेखि सुरू भएको सो व्यवसायमा सात करोड रुपैयाँ बराबरको लगानी गरिएको सञ्चालक चौधरीले बताए । हाल त्यहाँ ३ सय कुखुरा, तीन बंगुर, दुई भैँसी, दश हाँस, आठ गाई र ६० वटा बाख्रा पालिएको छ । होमस्टे र कृषि फार्ममा १२ जनालाई रोजगारी मिलेको छ ।
अब केही समयभित्र नै बाह्य पर्यटकलाई लक्षित गरेर व्यवस्थित खालको होमस्टे सञ्चालन गर्ने तयारीमा रहेको व्यवस्थापक चौधरीले बताए । होमस्टेमा एक दिनमा ३० जनासम्म बसोबास गर्न मिल्छ । यहाँ सञ्चालित होमस्टेका कारण गाउँमा उत्पादित कृषिजन्य वस्तु खपत गर्न सजिलो भएको छ । ग्रामीण कृषि उत्थानका लागि यहाँ सञ्चालित कृषि होमस्टेबाट ठूलो टेवा पुगेको छ ।
