सहरी गरिबीको अवस्थामा रहेका ललितपुर महानगरपालिकाको मंगलबजार क्षेत्र वरपरका कतिपय बासिन्दा विभिन्न आयमूलक व्यवसायमार्फत स्वरोजगार बन्न लागेका छन् ।
महानगरपालिकाको सहयोग तथा समन्वयमा सशक्तीकरण समाज (स्टेप) नेपालद्वारा सञ्चालित सहरी गरीबउन्मुख पर्यटन पुनरुत्थान परियोजनाले मंगलबजार र वरिपरिका क्षेत्रहरू वडा नं. ११, १६ र २० का १२१ जना स्थानीय व्यक्तिलाई विभिन्न तालिम प्रदान गरेपछि उनीहरू व्यवसायतर्फ आकर्षित भएका हुन् ।
सहरी गरीबलाई लक्षित गरी परियोजनाले नेपाली कागजबाट उत्पादित सामग्री, क्रिस्टलबाट निर्मित सामग्री, झोला र पर्स, नेपाली संस्कृति झल्काउने टिर्सट प्रिण्ट, सेरामिक्सवाट निर्मित सामग्री, काठका बुट्टेदार सजावट सामग्री, ऊनीका सामग्रीहरू, अर्गानिक हर्बल चिया, सिस्नो पाउडर आदि पर्यटनजन्य सामग्री उत्पादनसम्बन्धी छ महिनाको तालिम प्रदान गरेको थियो ।
तालिममा सहभागीहरूलाई प्रमाणपत्र वितरण गर्दै वडा नं ११ का वडाध्यक्ष इन्द्रमान महर्जनले सहभागीहरूले उत्पादन गरेका सामानलाई बजारीकरणमा महानगरपालिकाले सहयोग गर्ने बताए ।
सो अवसरमा पर्यटनविज्ञ रविजंग पाण्डेले उनीहरूले बनाएका समानहरुमा गुणस्तर बढाएर पर्यटकीय सम्पदा मार्गमा विक्री प्रवर्द्धन गर्नसके राम्रो लाभ लिन सकिने धारणा राखे ।
कार्यक्रमका सभापति तथा स्टेप नेपालका अध्यक्ष दलबहादुर जिसीले सहभागीहरूबाट उत्पादित सामग्रीहरूको बजारीकरण गर्न सकिएमा तालिमको सार्थकता हुने बताए । सो अवसरमा सहभागीहरूले बनाएका सामग्रीहरू प्रदर्शनीमा राखिएको थियो ।
स्थानीयस्तरमा उत्पादन नभए पनि कच्चा पदार्थ अन्यत्रबाट ल्याएर ती सामग्रीमा विशेष सीप र कला देखाई पर्यटकले रुचाउने खालका आकर्षक र ठीक साइजका बनाउने र घरमै बसीबसी पनि अतिरिक्त आम्दानी गर्न सकिने उनको भनाइ थियो ।
परम्परागत स्थानीय कला विशेषतः घरेलु हस्तकलाका सामग्रीहरू उत्पादन र विक्री गर्ने पर्यटकीय थलोको रुपमा चिनिएको मगंलबजार क्षेत्रमा यस तालिमले ललितपुर महानगरपालिकाका चारवटै वडाका स्थानीय बेरोजगार, अर्धवेरोजगार युवायुवती एवम् गृहिणीलाई विभिन्न प्रकारका पर्यटन सम्बद्ध क्रियाकलापमा संलग्न गराउने उद्देश्यले परियोजनाले क्षमता अभिवृद्धिमा जोड दिएको छ । रासस
