बोक्सीखोलामा चिज उद्योग स्थापना

बोक्सीखोलामा चिज उद्योग स्थापना


थासाङ गाउँपालिका–२ बोक्सीखोलामा गाई फार्म र चिज उद्योग स्थापना भएको छ ।

धौलागिरि गुरुसाम्फु कृषि सहकारी संस्थाले गाई फार्म र चिज उद्योग सञ्चालन गरेको हो । मुस्ताङमा आवश्यक दुग्धजन्य पदार्थको आपूर्ति गरी आयात घटाउने, रोजगारी सिर्जना र आयआर्जन वृद्धिका लागि गाई फार्मसँगै चिज उद्योग सञ्चालन गरिएको सहकारीका अध्यक्ष नरबहादुर हिराचनले बताए ।

‘मुस्ताङमा आवश्यक दूध, घ्यू र छुर्पी आपूर्तिका लागि गाईफार्म सञ्चालन गरिएको हो” उनले भने ‘यहाँ गाई फार्म सञ्चालन गरेपछि पोखराबाट आयात हुने दूध घटेको छ ।’

अध्यक्ष हिराचनका अनुसार हिमाली आयोजनाको सहयोगमा  ५६ लाख २३ हजार रुपैयाँको लागतमा फार्म स्थापना भएको हो । आयोजनाको ४२ लाख ९६ हजार रुपैयाँ र सहकारीको  १३ लाख २६ हजार रुपैयाँ लगानीमा स्थापना भएको फार्मका हाल २० वटा होलीस्टेन, जर्सी र जर्सी क्रस जातका गाई छन् ।

दैनिक ७० देखि ११५ लिटर दूध उत्पादन हुने गरेको छ । २५ जना सदस्य रहेको सहकारीले मुस्ताङमै पहिलो पटक चिज उद्योग सञ्चालन गरेको हो । दैनिक सात किलोका दरले चिज उत्पादन हुने गरेको छ । चिज प्रतिकिलो रु एक हजारमा जोमसोम, मार्फा, कागबेनी, टुकुचे, कोवाङ, लेतेका होटलमा खपत हुन्छ ।

चिज उत्पादन गरेर बचेको दूध विक्री हुने गरेको छ । दैनिक ६० लिटरभन्दा बढी दूध विक्री हुन्छ । फार्ममा पाँच जनाले रोजगारी पाएका छन् । मासिक  एक लाख ५० हजार रुपैयाँ बराबरको दूध र चिज विक्री हुने गरेको संस्थाले जनाएको छ ।

संस्थाले चौरी गाईको दूधबाट चिज उत्पादन गर्ने योजना बनाएको छ । ‘चौरी खर्क रहने गाउँमै अस्थायी संरचना बनाएर त्यहीँबाट उद्योग सञ्चालन गर्ने तयारी गरेका छौँ,” हिराचनले भने ‘चिज र दूध ढुवानीका लागि तीनवटा खच्चर खरीद गरिसकेका छौँ ।’ रासस

Share:

प्रतिकृया दिनुहोस

© 2017 Setopati Sanchar Pvt. Ltd.