योगाभ्यास र पञ्चकर्मबारे सेवा दिन बुढानीलकण्ठमा अन्तर्राष्ट्रियस्तरको योग सेण्टर बन्ने भएको छ । स्वास्थ्य मन्त्रालय, आयुर्वेद विभागको करीब १४ रोपनी जग्गामा ‘राष्ट्रिय आयुर्वेद पञ्चकर्म तथा योग सेण्टर’ निर्माण हुन लागेको हो ।
विभागका महानिर्देशक डा वासुदेव उपाध्यायले सामान्य जनतादेखि विशिष्ट, अति विशिष्ट व्यतित्वका लागि ठूलो योग सेण्टर बनाउने बताए । उनले भने, ‘अहिले त्यहाँ प्रशासनिक भवन बन्दैछ, जसका लागि रु एक करोड ५० लाख रुपैयाँ छुट्टाइएको छ, अन्य भवनका लागि नक्साङकन डिजाइन भइरहेको छ र पुरै भवनको मास्टरप्लान बन्दैछ, यो प्रोजेक्ट सम्पन्न गर्न करीब रु एक अर्ब खर्च हुने अनुमान गरिएको छ ।’
सेण्टरले मानिसलाई योग गर्नुपर्छ भन्ने बानीको विकास गर्ने विभागको भनाइ छ । केन्द्रमा सेण्टर बनाएपछि सातै प्रदेशमा यस्तो योग केन्द्र खोल्ने योजना छ, जुन नसर्ने रोगको न्यूनीकरणमा महत्वपूर्ण हुने बताइएको छ । सेण्टरमा स्वस्थ जीवनशैली, सन्तुलित खानपान, योग, पञ्चकर्म, अकुपञ्चरलगायतका सेवा दिई नसर्ने रोगका लागि काम हुने महानिर्देशक उपाध्यायको भनाइ छ । रासस