परराष्ट्रमन्त्रीसँग उद्योग वाणिज्य महासङ्घको प्रतिनिधिको भेटवार्ता


उद्योग वाणिज्य महासङ्घका अध्यक्ष भवानी राणाको नेतृत्वको प्रतिनिधिमण्डल र उपप्रधान तथा परराष्ट्रमन्त्री कृष्णबहादुर महराबीच मङ्गलबार भेटवार्ता भएको छ । भेटको क्रममा उप्रधानमन्त्री महराले कूटनीतिक सम्बन्ध स्थापना भएका मुलुकका ‘द्विपक्षीय परामर्श संयन्त्र’मार्फत आर्थिक कूटनीतिलाई प्रभावकारी बनाइने बताएका छन् ।

प्रतिनिधिमण्डलसँगको कुराकानीमा मन्त्री महराले द्विपक्षीय परामर्श संयन्त्र भएका मुलुकमा संयन्त्रमार्फत र नभएका मुलुकमा संयन्त्र स्थापना गरेर आर्थिक कूटनीतिलाई प्रभावकारी रुपमा अगाडि बढाइने बताए ।

परराष्ट्र नीतिसम्बन्धी सुझाव दिन बनेको उच्चस्तरीय कार्यदलमा पनि उद्योग वाणिज्य महासङ्घले महत्वपूर्ण सुझाव दिने विश्वास व्यक्त गर्दै उप्रधानमन्त्री महराले अबका दिनमा राज्यले राजनीतिकभन्दा पनि आर्थिक मुद्दालाई विशेष प्राथमिकताका साथ अगाडि बढाउने बताएका उनका प्रेस संयोजक हरि लामिछानेले जानकारी दिए ।

सो अवसरमा महासङ्घका अध्यक्ष राणाले कूटनीतिक नियोगलाई निश्चित लक्ष्यसहितको कार्यक्रम दिएर पठाउनुपर्ने सुझाव दिँदै निर्यातमुखी कूटनीतिलाई विशेष ध्यान दिन आग्रह गरिन् ।

उनले कार्यदक्षता र क्षमताका आधारमा कूटनीतिक प्रमुखको कार्यावधि थपिनुपर्नेमा जोड दिँदै त्यसका विषयमा मन्त्रालयले विशेष नियमन गर्नुपर्ने बताईन् ।

Share:

© 2017 Setopati Sanchar Pvt. Ltd.